Դոնբասում ռազմական գործողությունների մեկնարկը կդառնա Ուկրաինայի «վերջի սկիզբը». Կրեմլի նեկայացուցիչ

Ռուսաստանի նախագահի վարչակազմի փոխղեկավար Դմիտրի Կոզակը նախազգուշացրել է, որ ռազմական գործողությունների մեկնարկը Դոնբասում կդառնա Ուկրաինայի «վերջի սկիզբը»: Lenta.ru-ի փոխանցմամբ՝ այս մասին նա հայտարարել է ապրիլի 8-ին կայացած ասուլիսում: 

Կոզակը չի բացառել նաև, որ Ռուսաստանն անհրաժեշտության դեպքում կկանգնի պաշտպանելու Դոնբասի բնակչությանը: Միևնույն ժամանակ պաշտոնյայի կարծիքով՝ Ուկրաինայի նախագահ Վլադիմիր Զելենսկիի այցը Դոնբաս պայմանավորված չէ տարածաշրջանում իրավիճակի սրմամբ: 

Կրեմլի ներկայացուցիչը վստահություն է հայտնել, որ Ուկրաինայի հարավ-արևելքում առկա հակամարտությունը կարելի է կարգավորել մեկ տարվա ընթացքում, սակայն դրա համար պետք է «գործել հետևողականորեն և հավատարիմ մնալ նախկինում ձեռք բերված պայմանավորվածություններին»: 

Հիշեցնենք, որ Զելենսկին ավելի վաղ աշխատանքային այցով մեկնել է Դոնբաս՝ հանդիպելու ուկրաինացի զինծառայողների հետ:   

Մինչ այդ հայտնի էր դարձել Ուկրաինայի Զինված ուժերի կազմում գրանցված մարտական կորուստների մասին: Դոնբասում իրավճակը սկսել է սրվել մարտի վերջից: Ուկրաինական կողմն ու Դոնեցկի և Լուգանսկի ինքնահռչակ հանրապետությունները միմյանց մեղադրում են գնդակոծության ակտիվացման մեջ: