Պատգամավորների մի մասի վրա կա կոմպրոմատ. Վազգեն Մանուկյան

Սա այն իշխանությունը չէ, որ ինքնակամ գնա։ Այս մասին լրագրողների հետ զրույցի ժամանակ ասաց Հայրենիքի փրկության շարժման վարչապետի միասնական թեկնածու Վազգեն Մանուկյանը՝ հավելելով, որ պետք է կոտրել այս իշխանության հենարանները։ 

«Հենարանները երեքն են, որոնցից մեկը կոտրելու կարիք չունի, այլ համոզել է պետք։ Դա մեր ժողովրդի այն հատվածն է, որը մինչև վերջ չի գիտակցել։ Երկրորդ հենարանն իշխանական պատգամավորներն են, որոնցից մեծ մասը ծուղակի մեջ են ընկել։ Նրանք, իսկապես հավատալով մտան «Իմ քայլ»-ի մեջ, բայց հակառակը ստացվեց։ Նրանց էլ պետք է համոզել և ճնշել։ Երրորդ ուժը ոստիկանությունն է։ Մարդիկ ուզում են աշխատավարձից չզրկվեն։ Կամաց-կամաց հասկանում են, որ իրականում ոչ թե իրենց պարտքն են կատարում պետության առջև, այլ Ադրբեջանի և Թուրքիայի առջև»,-ասաց Վազգեն Մանուկյանը։ 

Հարցին՝ ինչն է խանգարում պատգամավորներին դուրս գալ խմբակցությունից, Վազգեն Մանուկյանն ասաց, որ կան մի քանի պատճառներ․ 

«Պատգամավորների մի մասի վրա կա կոմպրոմատ։ Մեր ազգային անվտանգության ծառայությունը ոչ թե զբաղված է մեր պետության ներքին թշնամիներից ազատվելով, այլ կոմպրոմատ հավաքելով։ Շատ պատգամավորներ կան, որոնց վրա կոմպրոմատներ կան կամ էլ նրանց բարեկամների վրա»,-նշեց Վազգեն Մանուկյանը։