Թուրքիայից տարբեր տեսակի ապրանքների մեծածավալ ներմուծում է եղել Հայաստան. Բաբկեն Պիպոյան

Տեղական շուկայում դեռևս թուրքական ապրանք կա: Ուստի թուրքական ապրանքի ներմուծման արգելքի ազդեցությունը գնահատելը դեռ վաղ է: Aysor.am-ի հետ զրույցում «Իրազեկ և պաշտպանված սպառող» ՀԿ նախագահ Բաբկեն Պիպոյանն ասաց, որ մինչև դեկտեմբերի 31-ը Թուրքիայից տարբեր տեսակի ապրանքների մեծածավալ ներմուծում է եղել Հայաստան. «Այն ապրանքները, որոնք տեսակարար կշռով ազդեցություն ունեին շուկայում, դեռևս առկա են»:

Պիպոյանի խոսքով՝ պետք էր հասկանալ ոլորտների առանձնահատկությունները, խնդիրները, որոնք կարող էին առաջանալ:

«Օրինակ, տեքստիլի բիզնեսով Հայաստանում կարող էին զբաղվել մարդիկ, ովքեր ունեին ընդամենը մի քանի հազար՝ 4000-5000 դոլար: Իսկ հիմա, եթե համարում ենք, որ այլընտրանքներ գտնելու համար պետք է գնալ Չինաստան, 4000 կամ 5000 դոլար ունեցողը չի կարող այդ երկիր գնալ այդ փողով և բիզնեսն անել», - նշեց Պիպոյանը:

Նրա խոսքով, դրա համար պետությունը պետք է կարողանա համապատասխան մեխանիզմներ գտնել: