Տարբեր թիրախային խմբերին աջակցության ծրագրերը դեռ ընթացքի մեջ են. Ֆինանսերի փոխնախարար

Տարբեր թիրախային խմբերին աջակցության ծրագրերը դեռ ընթացքի մեջ են` մի գործընթաց, որը դեռ չի ավարտվել, դրա ֆինանսական ծախսի մասին խոսելը ժամանակավրեպ է:  Կլինի պետական բյուջեի  կատարման հաշվետվություն, որտեղ մանրամասն ներկայացված կլինի տեղեկատվությունը: Այս մասին այսօր՝ հունվարի 12-ին, ԱԺ-ում լրագրողների հետ զրույցում նշեց Ֆինանսերի փոխնախարար Արման Պողոսյանը՝ անդրադառնալով հարցին, թե որքան գումար է ծախսվել եւ ծախսվում բյուջեից պատերազմի հետեւանքով:

Հարցին, թե որ ուղղություններով է ծախսվել «Հայաստան» համահայկական հիմնադրամից վերցված շուրջ 53 մլրդ դրամը, փոխնախարարն ասաց. «Եղել է ֆինանսների նախարարության պաշտոնական հրապարակումը, եղել է նախարարի մեկնաբանությունն ու բացատրությունը այս հարցի առնչությամբ: Առաջիկայում կլինի բյուջեի կատարման հաշվետվություն, որտեղ կտեսնեք բոլոր հնարավոր  հարցերի պատասխանը: Կան ընթացակարգեր բյուջեների կատարման, հաշվետվությունների ներկայացման ժամկետներ, պատասխանատուներ, սպասեք, կամփոփվի եւ կներկայացվի»:

Արման Պողոսյանը հերքեց տեղեկությունները, թե կենսաթոշակի, նպաստի բաշխման ճգնաժամ է առաջացել, դրա համար ստիպված են եղել «Հայաստան» հիմնադրամից վերցրած միջոցներն ուղղել դրան. «Ոչ, Ֆինանսների նախարարությունը հայտնել է, որ միասնական բյուջետային գործընթացի առաջնահերթությունների, գերակայությունների շրջանակներում այդ միջոցների տնօրինում է իրականացվել: Իսկ աշխատավարձ, թոշակ վճարելու խնդիր չունենք»: