ԵԱՀԿ Մինսկի խումբը Երևանին ու Բաքվին կոչ է արել նախապատրաստվել բանակցությունների
ԵԱՀԿ Մինսկի խմբի համանախագահները (Իգոր Պոպով՝ ՌԴ, Ստեֆան Վիսկոնտի՝ Ֆրանսիա, Էնդրյու Շոֆեր` ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպրշիկը, ողջունելով հարաբերական անդորրը հայ-ադրբեջանական սահմանին, դիմել են Երևանին ու Բաքվին։
Համանախագահները կոչ են արել օգտվել դեէսկալացիայի փուլից և հող նախապատրաստել առարկայական բանակցությունների համար՝ հակամարտության համապարփակ լուծում որոնելու համար։
Համանախագահները հերթական անգամ նշել են, որ այս չափազանց զգայուն շրջանում շատ կարևոր է զերծ մնալը սադրիչ հայտարարություններից և գործողություններից, ներառյալ սպառնալիքներից՝ ուղղված քաղաքացիական հասարակությանը կամ չափազանց կարևոր ենթակառուցվածքին։
«Վերջին հրապարակային հայտարարությունները, որոնք քննադատում են ՄԽ համանախագահող երկրների ջանքերը և/կամ ձգտում միակողմանիորեն հաստատել կարգավորման գործընթացի ձևաչափի նոր «պայմաններ» կամ փոփոխություններ, չեն նպաստում կառուցողական երկխոսության վերսկսմանը։
Խաղաղ կայուն կարգավորման համար քաղաքական կամքը լավագույնս կարելի է դրսևորել՝ մաքսիմալիստական դիրքորոշումներից, սադրիչ հայտարարություններից և գործողություններիղ զերծ մնալով, հրադադարը խստորեն պահպանելով»,-նշվում է հայտարարության մեջ։
Համանախագահները հաստատել են իրենց պատրաստակամությունը ցանկացած ժամանակ հանդիպելու ղեկավարների կամ նրանց ներկայացուցիչների հետ և ընդգծել ԵԱՀԿ դիտորդների՝ հնարավորինս շուտ տարածաշրջան վերադարձի անհրաժեշտությունը։
