Վաղը ՍԴ հարցով ԱԺ արտահերթ նիստ է հրավիրվել
ԱԺ արտահերթ նիստը վաղը կայանալու է, ԱԺ խորհրդի նիստից հետո լրագրողներին ասաց «Իմ քայլը» խմբակցության ղեկավար Լիլիթ Մակունցը:
«Վաղը ժամը 11:00-ին գումարվելու է ԱԺ արտահերթ նիստ», - ասաց նա:
Նշենք, որ նիստի օրակարգում «Ազգային ժողովի կանոնակարգ», «Հանրաքվեի մասին» և «Սահմանադրական դատարանի մասին» սահմանադրական օրենքներում փոփոխություններ և լրացումներ կատարելու մասին նախագիծն է:
Հարցին, թե ինչպես կմեկնաբանի իրենց խմբակցության պատգամավոր Հովիկ Աղազարյանի հայտարարությանը, որ 37 հոգի չեն կարող նախագիծ համահեղինակել և որ ինքն անձամբ չի ստորագրել դրա տակ, Մակունցը նշեց, որ ծանոթ չէ Աղազարյանի արտահայտած կարծիքին և չի կարող մեկնաբանել այն:
Ըստ ՀՀ Սահմանադրությունում փոփոխություն կատարելու մասին օրենքի նախագծի, առաջարկվում է Սահմանադրության 2015 թվականի դեկտեմբերի 6-ի փոփոխությունների 213-րդ հոդվածը շարադրել նոր խմբագրությամբ. «Հոդված 213. Սահմանադրական դատարանի անդամների եւ նախագահի պաշտոնավարումը. մինչեւ Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է»:
«Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Կառավարությունը, Հանրապետության նախագահը և դատավորների ընդհանուր ժողովը: Սույն փոփոխություններով հոդվածի 1-ին մասի հիման վրա առաջացած թափուր տեղերը համալրելու ընթացակարգը և ժամկետները սահմանվում են «Սահմանադրական դատարանի մասին» սահմանադրական օրենքով նախատեսված հատուկ ընթացակարգով, որոնք պետք է ընդունվեն և ուժի մեջ մտնեն մինչև 2020 թվականի ապրիլի 1-ը»:
