ՀՀ կառավարության այսօրվա նիստում վարչապետ Նիկոլ Փաշինյանն անդրադարձավ «Արմաթ» լաբորատորիաների ծրագրին եւ նշեց, թե այդ հարցը վերջին շրջանում բազմաթիվ, ընդհուպ քաղաքական շահարկումների տեղիք է տվել:

««Արմաթ» լաբորատորիաների ծրագիրը ՀՀ-ում սկսվել է 2014 թվականին, եւ 2014-2017 թվականներին «Արմաթ» լաբորատորիաներին ֆինանսավորվել է 188 մլն դրամ պետական բյուջեից, իսկ ահա 2018 եւ 2019 թվականներին պետբյուջեից ֆինանսավորվել է 1 մլրդ 296 մլն դրամ»,- ասաց վարչապետը:

Նա նշեց, թե մինչեւ հեղափոխությունը ՀՀ-ում երեք տարվա ընթացքում բացվել է 220 ինժեներական լաբորատորիա, իսկ հեղափոխությունից հետո բացվել է 355 «Արմաթ» լաբորատորիա:

«Այսինքն՝ կրկնակիից ավելի ենք բացել, ֆինանսավորումն ավելացրել ենք մոտ 10 անգամ, եւ այսօր մարդիկ մեզ մեղադրում են, թե մենք «Արմաթ» լաբորատորիաների հետ կապված պրոբլեմ ենք առաջացնում»,- ասաց վարչապետը՝ հավելելով «Իսկ ո՞րն է պրոբլեմը»:

Նիկոլ Փաշինյանը նշեց, որ խնդիրը շատ պարզ բանի հետ է կապված. «Մենք այսօր ունենք 575 լաբորատորիա, որոնք ձեռք են բերվել մեկ կազմակերպությունից, եւ մենք ասում ենք՝ այս պահին պետք է մի պահ դադար վերցնենք, վերլուծենք, թե ինչպես է աշխատում այդ համակարգը, մենք պետք է խուսափենք մեկ անձից գնումներից: Այդ վերլուծությունների արդյունքում պետք է ներկայացնենք տեխնիկական առաջադրանք եւ սրանից հետո այդ լաբորատորիաներն իրականացնենք մրցութային կարգով: Այսինքն՝ մենք պետք է ասենք՝ այս-այս դպրոցներում պատրաստվում ենք ստեղծել լաբորատորիաներ եւ հրավիրում ենք մրցույթի: Մի դեպքում մի կազմակերպություն կարող է հաղթել, մյուս դեպքում՝ մեկ այլ»,- ասաց Փաշինյանը:

Վարչապետն ասաց, որ չի հասկանում, թե ովքեր են իրենց մեղադրում «Արմաթ» լաբորատորիաների հետ կապված տեխնոլոգիական առաջընթացին դպրոցներում խոչընդոտելու մեջ:

«Այս թվերը իրենք թող հրապարակեն, որից հետո էժան շահարկումների դաշտ մտնեն»,- ասաց նա: