ՏԵՍԱՆՅՈՒԹ. Բազմոցին պառկած մարդու աղքատությունը կառավարությունը չի հաղթահարելու. Փաշինյան

Բյուջետային ավիաընկերությունները ոչ լյուքս սեգմենտի զբոսաշրջիկների են բերելու Հայաստան, որոնք փոքր ու միջին բիզեսի պոտենցիալ հաճախորդներն են: Այս մասին այսօր՝ հունվարի 9-ին կառավարության նիստի սկզբում հայտարարեց ՀՀ վարչապետ Նիկոլ Փաշինյանը:

Նրա խոսքով, կառավարությունը միկրոբիզնեսն ազատել է հարկերից եւ ասում է՝ ահա ստեղված է ձեզ համար այն դաշտը, որ ոչ թե կառավարությունը կամ ինչ-որ մարդիկ պետք է ձեզ որոշակի գումար վճարեն, որ դուք լավ ապրեք, որովհետեւ այդպես հնարավոր չի լավ ապրել, այլ ստեղծված է դաշտ, որ դուք ձեր սեփական մտքով, նախաձեռնությամբ, հնարավորություն ունենաք վաստակել ձեր օրվա հացը:

«Սա է մեր բանաձեւը. մենք կառուցում ենք ճանապարհներ, մանկապարտեզներ, այլ ենթակառուցվածքներ, որ այս պոտենցիալ հաճախորդների եւ ապրանք ու ծառայություն առաջարկողների հաղորդակցությունը կայանա հնարավորինս հեշտ: Սա է ՀՀ-ում լավ ապրելու մոդելը: Չաշխատող մարդը երբեք ոչ մի երկրում լավ չի ապրել եւ չի կարող լավ ապրել:

Բազմոցին պառկած մարդու աղքատությունը կառավարությունը չի հաղթահարելու: Այդ մադրը առնվազն պետք է բռնի կառավարության մեկնած ձեռքը, առնվազն վեր կենալ բազմոցից: Իսկ երկարաժամկետ առումով լավ ապրելու բանաձեւը կրթությունն է: Հնարավոր չէ առանց կրթության, հմտության լավ ապրել, այս հնարավորություններից օգտվել»,-հայտարարեց Փաշինյանը:

Նա անդրադարձավ նաեւ տնտեսական աճին՝ նշելով. «2019-ի համար սպասում ենք բավականին բարձր տնտեսական աճ, իսկ 2020-ին մեր տնտեսական աճի ցուցանիշը պետք է լինի ավելի լավը, քան 2019-ին: Կառավարությունը պետք է շատ լուրջ ջանքեր գործադրի, բայց կառավարության ամենամեծ ջանքը հետեւյալն է՝ առաջնորդվել բժշկական սկզբունքով՝ նախ չխանգարել բիզնեսին, տնտեսվարողներին, որ նրանք ստեղծեն արդյունք, իսկ որտեղ կարող ենք օգնել, կօգնենք իրենց խնդիրների լուծմանը»: