Հեռանկարի շրջանակներում ՀՀ վարչապետի տիկին Աննա Հակոբյանն անդրադարձել է պալատական կյանքի վերաբերյալ իր պատկերացումներին՝ նշելով, որ չի կարող ասել՝ ինչպիսին է պալատական կյանքը, որովհետև իրենք չեն ապրում այդ կյանքով: Նրա համոզմամբ, այն փաստը, որ թիկնապահներ ունեն, չի նշանակում, որ իրենք պալատական կյանքով են ապրում: 

«Թիկնապահները պալատական կյանքի մաս չեն կազմում: Պալատական կյանքն իմ պատկերացմամբ այլ բան է. պալատական կյանքով ապրողն իրեն շրջապատում է տարբեր ատրիբուտներով, որոնց մեջ չեմ կարծում, որ թիկնապահները կամ անվտանգության ծառայությունը մտնում են: Մենք, ըստ էության, մեզ չենք շրջապատել և չենք պատրաստվում շրջապատել պալատական կյանքի ատրիբուտներով»,-նշել է նա: 

Անդրադառնալով ամառանոցի վերանորոգման համար ծախսված գումարներին՝ Աննա Հակոբյանը նշել է, որ իրենց ծանոթներից շատերը գնել են բնակարաններ և վերանորոգել այն ճիշտ նույնքան գումարներով, որքան արժեցել է իրենց առանձնատան վերանորոգումը: 

«Այդ պատճառով դա ինձ համար տարօրինակ չէ»,-ասել է վարչապետի տիկինը: 

Նա ավելացրել է, որ տանն օգնող ձեռք ունենալը ևս նորություն չէ իր համար: 

«Տասնյակ տարիներ ես տանը մշտապես ունեցել եմ օգնող ձեռք՝ իմ աշխատանքի բնույթից և իմ ամուսնու ծանրաբեռնվածությունից ելնելով»,-ասել է Ա. Հակոբյանը՝ նշելով, որ տան աշխատողն օգնել է երեխաների խնամքի և տնային տարբեր հարցերում: 

ՀՀ վարչապետի տիկին Աննա Հակոբյանը հարցազրույցում անդրադարձել է իր վարսահարդարին 20 հազար ԱՄՆ դոլար վճարելու վերաբերյալ խոսակցություններին: 

«Ես չգիտեմ, թե ինչպես են հաշվել. տարեկան աշխատավարձն է, թե այլ բան. բայց կարող եմ ասել, որ 2019 թ.-ի սեպտեմբերից սկսած իմ ամուսնու պահանջով այցերի ժամանակ ինձ չի ուղեկցում ոչ վարսահարդար, ոչ որևէ այլ օգնական»,-նշել է Աննա Հակոբյանը: 

Նա պատմել է, որ դա սկսվել է ԱՄՆ այցից, որտեղ տեղափոխման հետ կապված խնդիր է եղել: 

Վարչապետի տիկինը չի բացառում, որ վարսավիրի հետ կապված ծախսերն իր ամուսնուն ևս մեծ են թվացել և նա որոշել է վերացնել այդ երևույթը հատկապես այցերի ժամանակ: 

«Մեծ բաժինն այցերի ընթացքում է ծախսվում, քանի որ Հայաստանի ներսում փոխադրման կամ կեցության խնդիր չկա»,-նկատել է Ա. Հակոբյանը: 

«Այժմ կարող եմ ասել՝ մեծ թվով այցեր ես ունեցել եմ առանց նման մասնագետի օգնության»,- ասել է նա՝ միաժամանակ ընդգծելով, որ համացանցում ինչ-որ օգտատերեր նման այցերից լուսանկարներ են հրապարակել և գրել, որ տիկինն անխնամ տեսք ունի: 

«Բոլորովին բարդույթներ չունեմ. կարող եմ նաև առանց համապատասխան մասնագետի օգնության ներկայանալ: Բայց կարծում եմ, որ դրան կհետևեն այսպիսի խոսակցություններ՝ անխնամ է, արժե՞ այդպես ներկայանալ, երկիր է ներկայացնում և այլն,-ասել է Աննա Հակոբյանը և շարունակել,-Առաջարկում եմ, որ այս հարցում հանրությունը որևէ կոնսենսուսի գա, որովհետև դա ինձ համար ամենաառաջնային հարցերից չէ, ես սիրով գեղեցկանում եմ մասնագետի օգնությամբ և կարող եմ ներկայանալ իմ բնական գեղեցկությամբ թույլ տվեք ասել»: 
 

ՀՀ վարչապետի տիկին Աննա Հակոբյանի հետ հարցազրույցի տեսանյութը կարող եք դիտել սկզբնաղբյուր կայքէջում՝ SHANTNEWS-ում: