Առողջապահության փոխնախարարը կհեռանա՝ տեղը զիջելով Թորոսյանի հովանավորյալին. Hraparak.am

Առողջապահության փոխնախարար Լևոն Հակոբյանը կանգնած է պաշտոնը կորցնելու հանգամանքի առաջ։

Hraparak.am-ի փոխանցմամբ՝ նախարար Արսեն Թորոսյանն ուզում է Հակոբյանից ազատվել՝ նրա փոխարեն բերելով աշխատակազմի ղեկավարի պաշտոնակատար Արտյոմ Սմբատյանին։

Ըստ աղբյուրի, Արսեն Թորոսյանը նամակով դիմել է վարչապետին՝ խնդրելով աշխատանքից ազատել Լևոն Հակոբյանին, ինչի մասին փոխնախարարը ինչ-որ կերպ իմացել է և դեռ դեկտեմբերի սկզբին մամուլի միջոցով փորձել է աղմուկ բարձրացնել իր հնարավոր պաշտոնանկության և Արսեն Թորոսյանի հովանավորյալ Արտյոմ Սմբատյանի՝ պաշտոնին չհամապատասխանելու շուրջ։

Ինչպես մեզ ասացին, մամուլում բարձրացած աղմուկը չի օգնել փոխնախարարին և նրա պաշտոնանկությունը ժամերի հարց է։

Auroranews-ը տեղեկությունը ճշտելու համար զանգահարեց Առողջապահության նախարար Արսեն Թորոսյանի մամուլի խոսնակ Ալինա Նիկողոսյանին, որը մեզ հետ զրույցում ասաց, որ չունի նման ինֆորմացիա և տեղեկությունը չի կարող հերքել, կամ հաստատել: