«ՌուսՀիդրոն» կվաճառի «Սևան–Հրազդան ՀԷԿ-ը» Սամվել Կարապետյանին
«Коммерсант» թերթը գրում է, որ «ՌուսՀիդրոն» վաճառելու է «Սևան-Հրազդան ՀԷԿ-ը» Սամվել Կարապետյանի «Տաշիր» ընկերությունների խմբի կառույցներին:
Ըստ աղբյուրի՝ կասկադի արժեքը կարող է կազմել 173 միլիոն ռուբլի: Գնորդից պահանջվում է նաև մարել վարկերը: Փորձագետները կարծում են՝ գործարքը 2 կողմերին էլ ձեռնտու է, քանի որ «ՌուսՀիդրոն» ազատվելու է պարտքերից, իսկ «Տաշիր»-ը ընդլայնելու է իր ներկայությունը երկրի էներգետիկ հատվածում:
«Коммерсант»-ի աղբյուրները նաև հայտնել են, որ «ՌուսՀիդրոն» պայմանավորվել է վաճառել Միջազգային էներգետիկ ընկերության 90 տոկոսը, որին պատկանում է Հայաստանում «Սևան-Հրազդան» ՀԷԿ-ը, Սամվել Կարապետյանի «Տաշիր» խմբի կառույցներին: Գնորդը կլինի Հրազդանի էներգետիկ ընկերությունը, որին պատկանում է Հայաստանի ամենամեծ ՋԷԿ-ը՝ 1,11 ԳՎտ հզորությամբ:
«ՌուսՀիդրոն» «Ինտեր ՌԱՕ»-ից ՀԷԿ-ը գնել է 2011-ին 172,9 միլիոն ռուբլիով, վերջինս այն ստացել էր Ռուսաստանի ՌԱՕ ԵԷՍ-ի պառակտման արդյունքում: Այս գործարքի ավարտից հետո ռուսական ընկերությունների ակտիվում կմնա միայն Հրազդանի ՋԷԿ-ի 5-րդ բլոկը:
