Մյուս տարի ԵՊՀ բոլոր մասնաշենքերում թեքահարթակներ կկառուցվեն
Հաջորդ տարի Երևանի պետական համալսարանի բոլոր մասնաշենքերում թեքահարթակներ կկառուցվեն։ Այս մասին այսօր «Սոցիալական աշխատանքը և արժանապատիվ սոցիալական պաշտպանության արդի օրակարգը ՀՀ–ում» թեմայով ԵՊՀ–ում ընթացող գիտաժողովի ժամանակ ասաց ԵՊՀ ռեկտորի ԺՊ Գեղամ Գևորգյանը։
«Մեր հաջորդ տարվա ծախսերում ներառել ենք թեքահարթակների կառուցման գումարները։ Ճիշտ է, Երևանում թեքահարթակեր շատ կան, սակայն դրանց մեծ մասն ատրակցիոն են հիշեցնում, քանի որ դրանցից օգտվելն ուղղակի անհնար է։ ԵՊՀ–ում բոլոր չափանիշներին համապատասխան թեքահարթակներ կկառուցենք»,–ասաց նա։
Նրա խոսքով` հաջորդ տարի պետք է փորձեն նաև վերելակներ կառուցել այն մասնաշենքերում, որտեղ դրանք չկան։ ԵՊՀ ռեկտորը նշեց, որ այժմ կան ուսանողներ, որոնք հենաշարժողական խնդիրներ ունեն, և նրանց դասերը կազմակերպվում են առաջին հարկերում։
Գևորգյանը հայտնեց նաև, որ իրենք գումար են տրամադրում այն ուսանողներին ու մասնագետներին, որոնք աջակցում են ինչ–ինչ խնդիրներ ունեցող մյուս ուսանողների կրթական կարիքները հոգալու համար։ Օրինակ` հենաշարժական խնդիրներ ունեցողներին լսարաններ ուղեկցելու կամ էլ տեսողության խնդիրներ ունեցողներին դասապատրաստման հարցում աջակցողերին լրավճար է տրամադրվում։
ՀՀ աշխատանքի և սոցիալական հարցերի նախարար Զարուհի Բաթոյանն էլ նշեց, որ, ցավոք, Հայաստանում սոցիալական աշխատանքի ինստիտուտն ավելի շատ կայացել է ակադեմիական մակարդակում, սակայն այն պրակտիկ կիրառություն չի գտել այն չափով, որքանով դրա կարիքը եղել է։ Նախարարի խոսքով` ԵՊՀ–ում, օրինակ, 25 տարի է, ինչ գործում է սոցոլոգիայի, հետո արդեն սոցաշխատանքի բաժինը և, վստահաբար, սոցաշխատողի ինստիտուտի կայացման հարցում ավելին պետք է արվեր։
«ՀՀ կառավարության, աշխատանքի ու սոցիալական հարցերի նախարարության քաղաքականությունը կարիքի գնահատման և դրան համապատասխան ծառայությունների մշակման վրա պետք է հիմնված լինի։ Այդ իմաստով կարևորում ենք սոցաշխատողների փորձն ու գիտելիքները, ինչպես նաև համագործակցությունը մեզ հետ։ Սոցիալական աշխատանքի կարևորությունը ոչ միայն խնդիրների լուծման իմաստով է արդիական, այդ նաև այդ խնդիրները կանխարգելելու»,–ասաց նա։
Հիշեցնենք, որ նոյեմբերի 4-ը ՀՀ–ում նշվում է որպես սոցիալական աշխատողի օր: Սոցաշխատողի աշխատանքն ուղղված է անհատի, բնակչության խոցելի խմբերի և նրանց առջև ծառացած սոցիալական խնդիրների լուծմանը։
