Եթե գազի գինը բարձրանա, ՌԴ-ի հետ բարեկամաբար կխոսենք. Խանդանյան

Եթե գազի սակագնի բարձրացման հարց առաջանա, Հայաստանի իշխանությունները Ռուսաստանի հետ այդ հարցը կքննարկեն բարեկամաբար։ Այս մասին լրագրողների հետ զրույցում ասել է ՔՊ-ական պատգամավոր Սարգիս Խանդանյանը։

Նրա խոսքով՝ ինքը տեղեկություն չունի, թե վերջին շրջանում գազի սակագնի վերաբերյալ Ռուսաստանի հետ ինչ քննարկումներ են եղել, և չի ծանոթացել որևէ հայտարարության, որը հիմք կտար ենթադրելու, որ գազի գինը կարող է փոխվել։

«Չգիտեմ՝ գազի վերաբերյալ ՌԴ-ի հետ խոսակցություն երբ է եղել և ծանոթ չեմ հայտարարության, որը հիմք է, որ գազի սակագինը կարող է փոխվել»,- ասել է Խանդանյանը։

Միաժամանակ պատգամավորը նշել է, որ նման հարցի առաջացման դեպքում հայկական կողմը Ռուսաստանի գործընկերների հետ կքննարկի այն։

«Սակայն դիվերսիֆիկացիան կարևոր է այս հարցում։ Եթե չեմ սխալվում։ Իրանի հետ այդ ուղղությամբ կաշխատենք։ ԹՐԻՓՓ-ը ևս գազամուղին է վերաբերվում, այսինքն՝ ԹՐԻՓՓ-ի շրջանակներում Հայաստանով անցնելու է գազամուղ։ Իհարկե, սա հիմա շատ տեսական միտք է, բայց դա բարդ չէ գործնականում իրագործել»,- ասել է նա։

Խանդանյանը նաև անդրադարձել է TRIPP ծրագրին՝ նշելով, որ դրա իրականացումն արդեն գործնական փուլում է։

«ԹՐԻՓՓ-ի իրագործումը գործնական փուլում է, գիտեք, որ ԱՄՆ-ում ստեղծվել է համապատասխան ֆինանսական հիմնադրամ, որը ֆինանսավորելու է ծրագիրը, և արդեն ֆինանսական միջոցներ են կուտակվում»,- նշել է պատգամավորը։

Նրա խոսքով՝ այժմ իրականացվում է նաև ծրագրի իրագործելիության ուսումնասիրությունը։

«Մեծ հույս ունեմ, որ հնարավորինս արագ կանցնենք երկաթուղու բուն շինարարությանը»,- ասել է Խանդանյանը։

Նա հավելել է, որ հետաքրքրություն կա նաև էլեկտրագծերի հնարավորինս արագ կառուցման հարցում՝ ընդգծելով, որ TRIPP-ը միայն երկաթուղային նախագիծ չէ, այլ ենթակառուցվածքների ավելի լայն ծրագիր։

«ԹՐԻՓՓ-ը միայն երկաթուղի չէր, այլև այլ ենթակառուցվածքների ծրագիր էր»,- նշել է նա։