ԼՈՒՍԱՆԿԱՐՆԵՐ. Լիմոնադի 3 արտադրամասում խախտումներ են հայտնաբերվել․ ՍԱՏՄ-ն կասեցրել է արտադրությունը

Սննդամթերքի անվտանգության տեսչական մարմինը կասեցրել է երեք գազավորված և զովացուցիչ ըմպելիքների արտադրամասերի գործունեությունը՝ արտադրական գործընթացում հայտնաբերված սանիտարահիգիենիկ խախտումների պատճառով։

«Նավուր Լիմոնադ»

ՍԱՏՄ-ի տեսուչների վերահսկողության ընթացքում «Նավուր Լիմոնադ» արտադրամասում հայտնաբերվել է, որ արտադրական տարածքի հատակների և պատերի մակերևույթները պատրաստված չեն եղել անջրանցիկ, լվացվող և ախտահանվող նյութերից։

ՍԱՏՄ-ն այս խախտումը գնահատել է որպես սանիտարահիգիենիկ նորմերի խախտում և որոշել է կասեցնել արտադրամասի գործունեությունը՝ մինչև խախտումների վերացումը։

«Բուրջուա»

Աշտարակում գործող «Բուրջուա» գազավորված ըմպելիքների արտադրամասում արձանագրվել են ավելի լայնածավալ խախտումներ։

Մասնավորապես՝ արտադրամասում չեն բացառվել պարենային հումքի և պատրաստի սննդամթերքի, ինչպես նաև մաքուր և աղտոտված գույքի խաչաձևվող հոսքերը։

Չեն իրականացվել նաև տեխնիկական սարքավորումների անհրաժեշտ սպասարկումն ու ընթացիկ վերանորոգումը, ինչպես նաև արտադրական տարածքների պատշաճ մաքրման, լվացման, ախտահանման, միջատազերծման և կրծողների դեմ պայքարի աշխատանքները։

Խախտումներ են արձանագրվել նաև արտադրամասի հատակների, պատերի և դռների մակերևույթներում։ Դրանք չեն համապատասխանել անջրանցիկ, լվացվող և ախտահանվող նյութերի վերաբերյալ պահանջներին։

Արտադրամասի առաստաղները նույնպես չեն ապահովել անհրաժեշտ պայմաններ՝ կեղտի կուտակումը, բորբոսի առաջացումը, մասնիկների թափվելը և խոնավության խտացումը կանխելու համար։

Բացի այդ, սննդամթերքի հետ անմիջական շփման մեջ գտնվող սարքավորումները, գործիքները, պարագաներն ու բեռնարկղերը չեն համապատասխանել հիգիենիկ պահանջներին և չեն պահվել պատշաճ վիճակում։

Արտադրամասը նաև անձնակազմի համար նախատեսված հանդերձարան չի ունեցել։

ՍԱՏՄ-ն տնտեսավարողին պարտավորեցրել է վերացնել արձանագրված խախտումները և դրա համար սահմանել համապատասխան ժամկետ։

«Քուչակի Լուսաղբյուր»

Քուչակ գյուղում գործող «Քուչակի Լուսաղբյուր» լիմոնադի արտադրամասում ևս արձանագրվել են մի շարք սանիտարահիգիենիկ խախտումներ։

Այստեղ ևս չեն բացառվել հումքի և պատրաստի արտադրանքի, ինչպես նաև մաքուր և աղտոտված գույքի խաչաձևվող հոսքերը։

Արտադրամասում պատշաճ կերպով չեն իրականացվել սարքավորումների սպասարկումն ու վերանորոգումը, ինչպես նաև մաքրման, լվացման, ախտահանման, միջատազերծման և կրծողների դեմ պայքարի աշխատանքները։

Հատակները, պատերը և դռները չեն համապատասխանել անջրանցիկ, լվացվող և ախտահանվող մակերեսների պահանջներին։ Խնդիրներ են արձանագրվել նաև առաստաղի և վերևում գտնվող կառուցվածքների հետ կապված։

Սննդամթերքի հետ անմիջական շփման մեջ գտնվող սարքավորումները, գործիքներն ու պարագաները նույնպես չեն համապատասխանել հիգիենիկ պահանջներին։

Այս արտադրամասում ՍԱՏՄ-ն արձանագրել է նաև մակնշման խնդիր․ արտադրանքի բաղադրության մեջ ասպարտամի առկայությունը նշված չի եղել, և չի եղել պարտադիր՝ «Պարունակում է ֆենիլալանինի աղբյուր» գրառումը։

ՍԱՏՄ-ն տնտեսավարողին հանձնարարել է ձեռնարկել անհրաժեշտ միջոցներ՝ արտադրական տարածքն ու արտադրանքը սահմանված պահանջներին համապատասխանեցնելու համար և խախտումների վերացման ժամկետ է սահմանել։

Այսպիսով, երեք արտադրամասերի գործունեությունը կասեցվել է մինչև հայտնաբերված խախտումների վերացումը։