«Իրատես». Կուսակցությունը տանում էին Րաֆֆի Հովհաննիսյանի ձեռքից

«Իրատես» թերթը գրում է. «Ինչու քաղաքականությունից լրիվ կտրված Րաֆֆի Հովհաննիսյանը կրկին կուսակցական ակտիվ աշխատանքի է անցել։ Ժամանակին մսխած քաղաքական կապիտալը այսօր հազիվ թե հնարավոր լինի վերականգնել, ուրեմն ի՞նչն է անհանգստացրել Հովհաննիսյանին։

Ակտիվ քաղաքականություն վերադառնալու պատճառը ոչ թե իշխանությանն աջակցելը կամ նախկինների հետ նրա դեմ պայքարելն է, այլ ընդամենը միջնորդ լինելը։ «Ո՛չ պարոն Փաշինյանը, ո՛չ ես ոչ առաջինն ենք, ոչ էլ վերջինը, մենք միասին պետք է պատրաստենք նոր Հայաստանը հաջորդի համար: Մեր խնդիրն այն է, որ մենք պետք է գնանք ոչ թե մենիշխանության, անձնավորված իշխանության ճամփով, այլ պատրաստենք նոր ՀՀ-ն հաջորդի համար»,- հայտարարել է Րաֆֆի Հովհաննիսյանը։

Իրականում «Ժառանգություն» կուսակցության հիմնադիրը ոչ թե միջնորդության անհագուրդ ցանկություն ունի, այլ, մեր տեղեկություններով, կուսակցությունը կորցնելու վտանգ է զգացել։ Որպեսզի իր «շահած-պահած» քաղաքական միավորը վերջնականապես «չթռչի» ձեռքից, նա նորից փորձում է կուսակցության ղեկավարումը անձամբ ստանձնել։

Թե ինչ ճակատագիր կունենա վերակազմավորված կուսակցությունը, ժամանակը ցույց կտա, ինչպես Հովհաննիսյանն է ասում, երբ այդ «հաջորդը» գա»:

Առավել մանրամասն՝ թերթի այսօրվա համարում