Մտածում էի՝ ինքնաբացարկի համար ձեզ դրամական փոխհատուցում առաջարկեմ․ պաշտպանը՝ դատավորին

Դուք կանխակալ բացասական վերաբերմունք ունեք Յուրի Խաչատուրովի նկատմամբ և այս գործով պատշաճ դատարան համարվել չեք կարող:

 Այս մասին այսօր՝ դատարանում, հայտարարեց Խաչատուրովի պաշտպան Միհրան Պողոսյանը՝ միանալով Քոչարյանի պաշտպանի՝ դատավորին ինքնաբացարկ հայտնելու հիմքերին:

Պողոսյանը նշեց, որ սույն գործով Խաչատուրովի նկատմամբ ընտրված խափանման միջոցի հարցը երբեւէ քննարկման առարկա չի դարձվել եւ ՍԴ որոշումը ապօրինաբար չի կիրառվել իր պաշտպանյալի նկատմամբ: 

«Ես մտածում էի՝ ինքնաբացարկ հայտնելու համար ձեզ դրամական փոխհատուցում առաջարկեմ, քանի որ առկա իրողությունների շրջանակներում Հայաստանում կարծես թե նորմալ է գնահատվում, որ դատավորի կողմից չպաշտոնավերելու համար դրամական փոխհատուցում են առաջարկում»,- հայտարարել է  Պողոսյանը՝ օրինակ բերելով այն, որ Սահմանադրական դատարանի դատավորների՝ վաղ կենսաթոշակի անցնելու կարգավորումը:

Դատավոր Աննա Դանիբեկյանը Պողոսյանի արտահայտությունը որակել է որպես անհարգալից վերաբերմունք եւ նկատողության տեսքով սանկիցա կիրառեց: Այնուհետեւ դատարանը սահմանափակեց հայտարարություն անելու պաշտպանի իրավունքը՝ նշելով, որ Պողոսյանը ինքը, նման արտահայտություն անելով, զրկեց այդ իրավունքից:

Հիշեցնենք, որ այսօր Քոչարյանի պաշտպաններից Հայկ Ալումյանը երկու հիմքով ինքնաբացարկի միջնորդություն ներկայացրեց, որին միացան նաեւ մյուս պաշտպանները: Միջնորդության դեմ առարկեց մեղադրող եւ տուժող կողմը: Դատարանը հեռացել է խորհրդակցական սենյակ՝ որոշում կայացնելու: