Հայաստանում խոսքի ազատության վտանգված լինելու մասին չի կարելի խոսել. Մարուքյան

Հայաստանում խոսքի ազատության վտանգված լինելու մասին չի կարելի խոսել՝ դատելով մի քանի քաղաքացու ինքնագործունեությունից։ Այս մասին այսօր հայտարարել է ԼՀԿ ղեկավար Էդմոն Մարուքյանը՝ պատասխանելով «Հայելի» ակումբի վրա հարձակման մասին հարցին։

«Ովքեր որ նման բաներ են անում, լինելով վարչապետի կամ իշխող ուժի աջակիցը, նրանք այդ ուժին լավություն չեն անում։ Նրանք արջի ծառայություն են մատուցում, որով վնաս են հասցնում հենց այդ ուժին»,- ասել է Մարուքյանը։

Նրա խոսքերով՝ դեռ այդ ամենից հետո էլ մարդիկ դրական են արձագանքել ու ցանցում կոչեր են հնչեցրել, թե ակցիայի մասնակիցները դեռ մի բան էլ քիչ են արել։ Մարուքյանը մասնավորապես հիշեցրել է ԱՄՆ Գլենդելի բնակիչ հայերին, որոնցից կոչեր են եղել, թե հաջորդ անգամ իրենք էլ կգան նման բան անելու։

«Վաղը, մյուս օրը մենք սկսելու ենք մեր երկիրը պաշտպանել տարբեր զեկույցներից, որտեղ գրված է լինելու, որ եղել է նման բան։ Հիմա ինչի՞ ենք անում նման բան, որ հետո գնանք էդ զեկույցների դեմ հերոսաբար պայքարենք»,- ասել է Մարուքյանը։