Վերին Լարսում մեքենաների կուտակումները նվազել են
Վերին Լարսի անցակետով Ռուսաստանից Վրաստան և Հայաստան եկող մեքենաների կուտակումները նվազել են։ Եթե օրեր առաջ այդ մեքենաների քանակը հասել էր 1300-ի, ապա հիմա այդ կուտակումը մոտ 350 է։
Այս մասին այսօր Ազգային ժողովում հայտնել է ՀՀ էկոնոմիկայի նախարար Տիգրան Խաչատրյանը։
Նա հայտնել է, որ կուտակումները կապված են եղել ստուգումներով․ մաքսային մարմինները խստացրել են պահանջները և որոշել են թույլ չտալ անցնել այն մեքենաներին, որոնք գերծանրաբեռնված են եղել։ Դրա հետևանքով զգալի կուտակումներ են եղել։ Այդ ժամանակ նրանք ստուգում էին բոլոր մեքենաները։
Բայց ավելի ուշ, ըստ նախարարի, մաքսային ծառայությունը որոշել է ընտրանքային ստուգում իրականացնել, այսինքն` ստուգել միայն պատահական ընտրությամբ նշված մեքենաները։ Արդյունքում բացթողման տեմպը, ըստ նախարարի ավելացել է։
Ավելին, քանի որ մեքենաների տերերն իմացել են, որ հնարավոր է ստուգվեն ու խնդիրներ ունեն, ըստ նախարարի՝ սկսել են ավելի քիչ բեռնել մեքենաները՝ երկար սպասելուց խուսափելու համար։
