Ջոնսոնը խոստացել է ամեն բան անել, որպեսզի երկիրը լքի ԵՄ-ն հոկտեմբերի 31-ից ոչ ուշ
Մեծ Բրիտանիայի վարչապետ Բորիս Ջոնսոնը խոստացել է անել հնարավոր ամեն բան, որպեսզի երկիրը լքի ԵՄ-ն հոկտեմբերի 31-ից ոչ ուշ։
Նա հայտարարել է, որ ոչ մի պարագայում չի դիմի ԵՄ-ին՝ Brexit-ի հետաձգման խնդրանքով։ Այս մասին նա ասել է Ուեյքֆիլդում՝ ոստիկանության աշխատակիցների առջև ելույթ ունենալիս, փոխանցում է Sky News-ը։
«Ես հոգ կտանեմ այն մասին, որպեսզի այդ անհարկի հետաձգումը չլինի, և մեր երկիրը լքի ԵՄ-ն հոկտեմբերի 31-ին»։ Ջոնսոնն այն կարծիքին է, որ ավելի լավ է մահացած պառկել փոսում, քան Brexit-ի հետաձգում խնդրել։
Ինչպես ավելի վաղ հայտնել էինք, Ջոնսոնը որպես ելք տեսնում է արտահերթ խորհրդարանական ընտրությունների անցկացումը, սակայն երեկ բրիտանական խորհրդարանը մերժեց հոկտեմբերի 15-ին արտահերթ ընտրությունների անցկացման վարչապետի առաջարկը։
Նշենք, որ վարչապետը համընդհանուր ընտրություններ անցկացնելու առաջարկով էր հանդես եկել այն բանից հետո, երբ Համայնքների պալատն ընդունել էր կոշտ Brexit-ն արգելող օրինագիծ, այսինքն՝ այն արգելում է հոկտեմբերի 31-ին սպասվող Brexit-ը՝ ԵՄ-ի հետ գործարքի բացակայության դեպքում։
