«Ժողովուրդ». Մարուքյանը գնում է կառավարություն ծանոթանալու գաղտնի փաստաթղթին

«Ժողովուրդ» թերթը գրում է. «ԱԺ «Լուսավոր Հայաստան» խմբակցության ղեկավար Էդմոն Մարուքյանը պատրաստվում է գնալ կառավարություն և ծանոթանալ 2014 թվականին պատրաստված հույժ գաղտնի փաստաթղթին, որի մասին օգոստոսի 4-ին իր ֆեյսբուքյան ուղիղ եթերում հայտարարել էր ՀՀ վարչապետ Նիկոլ Փաշինյանը: Այս մասին «Ժողովուրդ» օրաթերթի հետ զրույցում հայտարարեց Էդմոն Մարուքյանը: Վարչապետի հայտարարությունից հետո` օգոստոսի 5-ին, ԱԺ «Լուսավոր Հայաստան» խմբակցության ղեկավար Էդմոն Մարուքյանը գրություն էր ուղարկել ՀՀ Նիկոլ Փաշինյանին եւ խնդրել տրամադրել գաղտնի զեկույցի օրինակը: Եվ, ահա, վարչապետի աշխատակազմում երկար քննարկումներից հետո որոշել են Էդմոն Մարուքյանին հրավիրել կառավարություն` անձամբ ծանոթանալու դրան: «Պետք է գնամ, որպեսզի տեղում հասկանամ` ինչ փաստաթղթի մասին է խոսքը: Փաստաթուղթը հույժ գաղտնի է. եթե լինի նման փաստաթուղթ, կասեմ դրա մասին: Ես կարծում եմ, որ եթե կանչել են, նշանակում է` նման փաստաթուղթ կա»,- «Ժողովուրդ» օրաթերթի հետ զրույցում նշեց Էդմոն Մարուքյանը»: 

Մանրամասն՝ թերթի այսօրվա համարում։