ԱՄՆ ավիահարվածներից Սիրիայում 700 խաղաղ բնակիչ է զոհվել․ Էրդողան
Թուրքիայի նախագահ Ռեջեփ Թայիփ Էրդողանը կտրուկ քննադատության է արժանացրել ԱՄՆ ավիահարվածները սիրիական Իդլիբ քաղաքի տարածքում։ Նա հայտարարել է, որ Միացյալ Նահանգները փորձում են գետնին հավասարեցնել քաղաքը, ինչպես և Հալեպը։
«ԱՄՆ իրականացրած ռմբակոծության արդյունքում մահացել է մոտ 700 խաղաղ բնակիչ։ Իհարկե, քաղաքում կարող են լինել նաև զինյալներ, բայց Իդլիբն աստիճանաբար վերանում է», – տեղական լրատվամիջոցների փոխանցմամբ՝ ասել է Էրդողանը։
Նա ասել է, որ իրենք հասնելու են նրան, որ Սիրիայում ստեղծեն «անվտանգության գոտի», որպեսզի այնտեղ տեղավորեն փախստականներին։ Էրդողանը նշել է, որ Իդլիբի հարցը բարձրացվելու է և՛ Ռուսաստան-Իրան-Թուրքիա եռակողմ հանդիպմանը, և՛ ՄԱԿ-ի գլխավոր ասամբլեայի նստաշրջանում, որոնք կայանալու են սեպտեմբերի կեսերին։
