Ստամբուլյան կոնվենցիան շուտ չի լինելու Ազգային ժողովի օրակարգում. Մակունց

Արձակուրդից հետո սա խմբակցության պաշտոնական առաջին հանդիպումն է: Այս մասին լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը` անդրադառնալով «Իմ քայլը» խմբակցության այսօրվա փակ նիստին:

«Քննարկելու ենք այն հարցերը, որոնք առաջիկայում լինելու են մեր օրակարգում, հանձնաժողովները կներկայացնեն կատարված աշխատանքները, կներկայացվեն առաջարկներ»,-ասաց նա` ներկայացնելով օրակարգը:

Ինչ վերաբերում է Ստամբուլյան կոնվենցիայի հարցի քննարկման հետաձգմանը, Լիլիթ Մակունցն ասաց. «Առնվազն եթե հիշենք, թե ինչ ընթացակարգերով պետք է անցնի կոնվենցիան, ենթադրվում էր, որ հենց այդպես էլ պետք է լինի, որովհետև եթե նախարարությունը ուղարկել է Վենետիկի հանձնաժողով, ժամանակ է պահանջվում, որպեսզի նրանցից պատասխան գա, հետո պարտադիր ընթացակարգով պետք է լինի Սահմանադրական դատարանում, այնուհետև նոր ԱԺ օրակարգում կհայտնվի: Այնպես որ, սպասելի էր, որ շուտ չի լինելու և զարմանում էի, թե ինչպես կամ որտեղից է շրջանառվում սեպտեմբեր ամիսը»:

Անդրադառնալով Ամուլսարի հանքի շահագործման հարցին, խմբակցության ղեկավարն ասաց, որ կառավարությունը հակապետական, ապազգային որոշում չի կայացնի:

«Նոր ՇՄԱԳ (շրջակա միջավայրի վրա ազդեցության գնահատում) անհրաժեշտության հարցը ուսումնասիրվում է Շրջակա միջավայրի նախարարությունում, կտեսնենք, թե ինչ կլինի արդյունքը»,-հավելեց  նա: