Այս զորակոչին մեկնողներն արդեն կստանան բանակի նոր ճտքակոշիկներ. գնդապետ Արմեն Ավթանդիլյան
Զինված ուժերի կենտրոնական հավաքակայանում այսօր ծառայության են մեկնում «Ես եմ» ծրագրով զորակոչվողները։ Նրանք կամավորության սկզբունքով ընտրել են առաջնագծում ծառայությունը երեք տարով, ինչի համար ստանալու են արտոնություններ:
Հավաքակայանում նորակոչիկներին այս պայմանները նորից մանրամասնեց ու բարի ծառայություն մաղթեց ՀՀ գլխավոր զինվորական կոմիսարի պաշտոնակատար, գնդապետ Արմեն Ավթանդիլյանը։ Ավելի ուշ զինվորականը լրագրողներին տեղեկացրեց, որ բացի «Ես եմ» ծրագրի մասնակիցներից, այսօր ծառայության են մեկնում երաժիշտ-զինծառայողները և մի քանի մարզերի նորակոչիկներ։
Այս զորակոչին բանակ մեկնողներն արդեն կստանան բանակի նոր ճտքակոշիկներ։ Արմեն Ավթանդիլյանի խոսքով մարդ կա համազգեստը, հագուստը պահում է, մարդ կա՝ շատ շուտ փչացնում է: «Նմանատիպ դեպքերում զինծառայողները կարող են դիմել իրենց հրամանատարներին։ Ինձ թվում է՝ նրանց հրամանատարները չեն մերժի, նոր համազգեստներ կտրամադրեն մեր զինծառայողներին», – ասաց Ավթանդիլյանն ու նշեց, որ մինչև հիմա մերժման դեպք չունեն։
Անդրադառնալով բանակում ինքնասպանություններին, Արմեն Ավթանդիլյանն ասում է, որ բանակում նման դեպքեր լինում են այնպես, ինչպես լինում են քաղաքացիական կյանքում։ Բայց զինվորականներն ամեն ինչ անում են, որպեսզի բանակում նման դեպքերը կանխեն։ Նա ասաց, որ խնդիրները գալիս են նաև դպրոցից, բուհից, ընտանիքի սոցիալական վիճակից և այլ հարցերից։ Բայց անկախ դրանից, պնդում է զինվորականը, իրենք նաև հոգեբանական աշխատանք են տանում թե՛ հավաքակայանում, թե՛ զորքերում, որպեսզի նման դեպքեր չլինեն։
