Երթևեկության հանդիպակաց գոտի դուրս գալու համար՝ 150 հազար դրամ տուգանք. ԲՀԿ-ն օրինագիծ է դրել շրջանառության մեջ
Ազգային ժողովի «Բարգավաճ Հայաստան» խմբակցության պատգամավորներ Վահե Էնֆիաջյանը ու Նաիրա Զոհրաբյանը Վարչական իրավախախտումների մասին օրենսգրքում փոփոխություններ են այսօր դրել շրջանառության մեջ։ Պատգամավորները մասնավորապես, առաջարկում են խստացնել ճանապարհային երթևեկության որոշ խախտումներ։
Այսպես, նախագծով առաջարկվում է տրանսպորտային միջոցների վարորդների կողմից հանդիպակաց երթևեկության գոտի դուրս գալու համար սահմանել տուգանք՝ 150.000 ՀՀ դրամի չափով։ Ըստ Էնֆիաջյանի, փորձը ցույց է տալիս, որ ներկայում գործող տուգանքը՝ 30.000 ՀՀ դրամ, բավարար չափով զսպող ուժ չունի և չի նպաստում նման խախտումների թվի նվազմանը:
«Հանդիպակաց երթևեկության գոտի դուրս գալու համար պատասխանատվության զգալի խստացումը կնպաստի այդ՝ ամենավտանգավոր և ամենամահաբեր խախտումներից մեկի թվի զգալի նվազեցմանն ու կանխարգելմանը», հայտարարել է ԲՀ պատգամավորը։
Նշենք, որ վերջին շրջանում ճանապարհատրանսպորտային պատահարների հետևանքով մահվան ողբերգական դեպքերը ստիպել էին մի խումբ ակտիվիստների հանդես գալ երթևեկության հանդիպակաց գոտի դուրս գալու խախտումը քրեականացնելու պահանջով։ Սակայն պատգամավորները գտել են, որ այդ նախաձեռնությունը կարող է վիճահարույց լինել։
