ՏԵՍԱՆՅՈՒԹ․ Մանրամասներ` Կոտայքի մարզում "սարը քանդելու" և ավազ գողանալու դեպքից
Կոտայքի մարզի Աղբյուրակ գյուղի ամառանոցների մոտ անհայտ անձինք սարից ավազ են տանում։ Radio Aurora-ին տեսանյութը ուղարկել է ռադիոլսողներից մեկը։ Նրա խոսքով՝ նախապես չի զգուշացվել սարից ավազ տանելու մասին, և ըստ նրա՝ ոչ ոք այդ մասին տեղյակ չէ։
Կադրերն արվել են երեկ։ Մենք փորձեցինք պատկան մարմիններից պարզաբանում ստանալ տեղի ունեցածի վերաբերյալ։ Հրազդանի համայնքապետարանից AuroraNews.am-ի թղթակցի հետ զրույցում հայտնել են, որ իրենք տեղյակ չեն եղել տեղի ունեցածից և այժմ միջոցներ են ձեռնարկում պարզելու համար, թե ովքեր են եղել ավազը տանողները:
Համայնքապետարանից հայտնում են, որ այդ անձինք հասցրել են երկու բեռնատար ավազ տանել տեղանքից, սակայն երբ ամառանոցների բնակիչները աղմուկ են բարձրացրել, նրանք փախուստի են դիմել:
Ըստ մեր զրուցակցի` համայնքի ղեկավարի տեղակալ Վարուժան Սաֆարյանի` այդ տեղանքում նման գործունեություն ծավալելու թուլտվություն առհասարակ չկա: Հավանաբար, անհայտ անձինք ընտրել են այդ վայրը` հաշվի առնելով, որ դա գյուղից հեռու է և այդկերպ իրենց ոչ ոք չի տեսնի:
