Պետական պաշտոնյաները սկսել են «Ֆեյսբուք» սոցցանցով միավորել միմյանց, գրում է 168.am-ը:

Օրերս Սոցիալական ապահովության ծառայության (ՍԱԾ) պետի տեղակալ, նախկին ակտիվիստ Արսեն Օհանյանը «Ֆեյսբուքով» ի լուր աշխարհի հայտարարել է, թե պետական համակարգում ներքին լարվածություն կա:

Իրավիճակը հունից դուրս է եկել, քանի որ  իրար դեմ անհաշտ պայքար են մղում  երկու  նորեկ ղեկավարները՝  ՍԱԾ պետ Սուրեն Ղամբարյանը և նրա տեղակալ Արսեն Օհանյանը:

Նրանց վերադասը համարվող աշխատանքի և սոցիալական հարցերի նախարար Զարուհի Բաթոյանը 168.am–ի հետ զրույցում խոստովանել է, որ պրոցեսները նոր չեն, և խնդիրը «շատ լուրջ» է որակել:

Նախարարը, հակառակ ծառայության պետի  տեղակալի պնդումների, որ տեղ են գտել նրա գրառման մեջ, հայտարարել է, որ ՍԱԾ պետ Սուրեն Ղամբարյանի և  տեղակալ Արսեն Օհանյանի միջև լարվածությունն  անձնական բնույթ չի կրում, բացառապես աշխատանքային է և սկիզբ է առել տեղակալի անպտուղ աշխատանքի հանդեպ պետի դժգոհությունից:

Բանն այն է, որ ծառայության պետ Ղամբարյանը դժգոհ է տեղակալ Արսեն Օհանյանի և աշխատակազմի ղեկավար Վանիկ Բաբաջանյանի աշխատանքի որակից և այս մասին զեկուցել է նախարար Բաթոյանին:

Ինքը՝ Բաթոյանը ևս, պարբերականի հետ զրույցում ասել է, որ իրեն ծառայության պետը նույն խնդիրներով մի քանի անգամ է  դիմել, ինչից հետո  անձամբ լսել է բոլոր կողմերին, այդ թվում՝ ծառայության  աշխատակազմի ղեկավարին, և դեռևս մտմտում է՝  խնդիրն ինչպես հանգուցալուծել:

Ստացվում է՝ նախարարը լիովին տեղեկացված է եղել ծառայության ներքին խնդիրներին:

168.am–ի տեղեկություններով` Արսեն Օհանյանը պետական համակարգում իր նշանակվելու պահին ՌԴ իրավապահների կողմից  հետախուզման մեջ է գտնվել գողության մեղադրանքով: