Սևանի ջրիմուռները թունավոր տոքսիններ են արտադրում. մասնագետն ահազանգում է

ՍԱՊԾ առաջին պետ, միջազգային փորձագետ Գրիգոր Գրիգորյանը լրագրողների հետ զրույցում պատմել է, որ Սևանն առաջին անգամը չէ, որ ծաղկում է, և բնությունը նման ազդակ ուղարկել էր նաև անցած տարի, սակայն բավարար ուշադրություն չեն դարձրել:

Մասնագետը նշում է, որ այդ ծաղկած ջրիմուռները կարող են պարունակել բավականին լուրջ վտանգ, քանի որ բոլոր ջրիմուռներն արտադրում են տոքսիններ և դրանք խիստ վտանգավոր են մարդու, կենդանիների առողջության համար: Այդ տոքսիններից են բիոտոքսինները և ցիտոտոքսինները: Ցիտոտոքսինները կարող են սպանել բջիջը, իսկ բիոտոքսիններն ունակ են մահ պատճառել:

«Կարելի է ասել, որ ստեղծված վիճակը հանցավոր անգործության արդյունք է, քանի որ, երբ բնությունն ազդակներ է տալիս, անմիջապես պետք է միջոցներ ձեռնարկվեն»,- ասել է Գրիգոր Գրիգորյանը:

Գրիգորյանը պատմում է, որ այդ տոքսիններն ունակ են մտնել նույնիսկ սննդային շղթա: Անդրադառնալով Սևանի տարածքում ապրող տնտեսվարողների կազմակերպած ցույցին՝ Գրիգորյանը նշեց, որ այդ մարդկանց պատշաճ չեն տեղեկացրել, թե ինչ վտանգների մասին է խոսքը: