Համբավս արատավորելու փորձերը դատապարտված են ձախողման. Սավել կարապետյանի եղբորորդու արձագանքը. Tert.am
Ցանկություն չունեմ մեկնաբանել տարբեր բանսարկություններ, միայն կասեմ, որ իմ մասնակցությամբ ծեծի վերաբերյալ մամուլի հրապարակումներն իրականությանը չեն համապատասխանում, որեւէ մեկի նկատմամբ բռնություն չեմ գործադրել: Այս մասին Tert.am-ի հետ զրույցում ասել է «Տաշիր» ընկերությունների խմբի ներկայացուցիչ Նարեկ Կարապետյանը:
«Որոշ մարդիկ իմ բարի համբավն արատավորելու փորձեր են անում, որոնք դատապարտված են ձախողման»,-հավելել է նա:
Հիշեցնենք, որ այսօր երեկոյան մի շարք լրատվամիջոցներ չստուգված եւ հակասական տեղեկություն տարածեցին, թե «Տաշիր» ընկերության սեփականատեր Սամվել Կարապետյանի եղբորորդին՝ Նարեկ Կարապետյանը, իբր, ծեծի է ենթարկել ոմն Վահե Պարազյանին: Ն. Կարապետյանը Tert.am-ի հետ զրույցում ասաց, որ կա հարուցված քրեական գործ եւ ինքն ակնակալում է, որ բոլոր մեղավորները պատասխանատվության կենթարկվեն:
Նշվում է, որ իրավապահ մարմինների մեր աղբյուրների փոխանցմամբ՝ շրջանառվող տեղեկությունները, թե Նարեկ Կարապետյանը ծեծի է ենթարկել Վահե Պարազյանին, իրականությանը չի համապատասխանում: Ուշագրավ է նաեւ այն հանգամանքը, որ թեեւ ենթադրյալ միջադեպը տեղի է ունեցել հուլիսի 3-ին, բայց գործարար ներկայացող Վահե Պարազայանն անհասկանալի պատճառներով մեկ շաբաթից հետո է միայն որոշել կատարվածի մասին պատմել լրատվամիջոցներին:
Ըստ շրջանառվող տեղեկության, Պարազյանը թեեւ աշխատել է Կարապետյանների բիզնեսում, սակայն նույն բիզնես գործառույթներն ունեցող սեփական ընկերություն է հիմնել եւ փորձել է մութ գործարքներ իրականացնել Կարապետյանների մեջքի հետեւում՝ յուրացնելով տենդերները:
Տեղեկանալով կատարվածի մասին՝ Նարեկ Կարապետյանն օրերս իր ընտանիքին պատկանող ռեստորանում հանդիպել է Պարազյանին՝ նրանից պահանջելով դադարեցնել այդ գործելաոճը:
Այնուհետ, երիտասարդների խոսակցությունը շարունակվել է դրսում որտեղ էլ, ըստ ականատեսի, Վահե Պարազյանը փորձել է հարվածել Նարեկ Կարապետյանին, սակայն անվտանգության աշխատակիցները կանխել են միջադեպը: Կատարվածից հետո Պարազյանը դիմել է իրավապահներին, իսկ յոթ օր անց որոշել է դեպքի մասին պատմել լրատվամիջոցներին՝ աղավաղելով փաստերը եւ կատարվածը ներկայացնելով իր օգտին:
