Բանկերի աշխատանքը չի տուժել. ԿԲ խոսնակ
Էներգետիկ համակարգի վթարի հետևանքով բանկերի աշխատանքը չի տուժել: Այս մասին Tert.am-ի հետ զրույցում հայտնել է ՀՀ Կենտրոնական բանկի խոսնակ Հարություն Կբեյանը:
«Որևէ խնդիր չկա, բանկերը իրականացրել են և շարունակում են իրականացնել իրենց բնականոն աշխատանքը»,- լրատվականին ասել է նա:
Հիշեցնենք, որ Երևանի տարբեր վայրերում այսօր ժամը 13:00-ի սահմաններում էլեկտրականության տատանումներ են գրանցվել: Ճգնաժամային կառավարման կենտրոնից տեղեկացրել են, որ օպերատիվ խմբերն աշխատում են մարդկանց զանգվածային կուտակում ունեցող վայրերում՝ հատկապես մետրոյում:
ՀՀ փոխվարչապետ Տիգրան Ավինյանը ֆեյսբուքյան իր էջում տեղեկացրել էր, որ Երևանի ՋԷԿ-ը և Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի:
Իսկ Երևանի քաղաքապետարանի մամուլի խոսնակ Հակոբ Կարապետյանը տեղեկացրել էր, որ հոսանքի տատանումների պատճառով մետրոպոլիտենի ամբողջ երկայնքով էլեկտրաէներգիայի մատակարարումը ընդհատվել է: Որոշ հատվածներում գնացքները մնացել են թունելներում:
