Երևան-Երասխավան վթարի հետևանքով վիրավորվել է 12 մարդ. նրանք Երևանի տարբեր հիվանդանոցներում են

ՀՀ առողջապահության նախարարի մամուլի խոսնակ Ալինա Նիկողոսյանը ֆեյսբուքյան իր էջում Երևան-Երասխավան ճանապարհին տեղի ունեցած դեպքի վերաբերյալ նախնական տեղեկատվություն է հրապարակել:

«Վթարի հետևանքով նախնական վիրավորվել է 12 մարդ, որից 4-ը տեղափոխվել են Ճառագայթային բժշկության և այրվածքների գիտական կենտրոն, 1-ը Էրեբունի բժշկական կենտրոն, 1-ը Սուրբ Աստվածամայր բժշկական կենտրոն, 6-ը Արարատի բժշկական կենտրոն: Կան զոհեր. ճշտվում է թիվը և կտրվի լրացուցիչ տեղեկատվություն: Առողջապահության նախարար Արսեն Թորոսյանի հանձնարարականով` նախարարի տեղակալներն այցելում են հիվանդանոցներ և տեղում ծանոթանում իրավիճակին», – ասված է հայտարարության մեջ:

Առողջապահության նախարարի տեղակալ Լևոն Հակոբյանը Ճառագայթային բժշկության և այրվածքների գիտական կենտրոնում է, ուր տեղափոխվել են Երևան-Երասխավան ճանապարհին տեղի ունեցած վթարից տուժածներից չորսը:

SHANTNEWS.am-ի հետ զրույցում Հակոբյանը ներկայացրել է վթարից տուժածների առողջական վիճակի մասին որոշ մանրամասներ: Նա նշել է, որ տուժածներից երկուսի վիճակը գնահատվում է ծանր, երկուսինը՝ բավարար: