Աշխատանքի և սոցիալական հարցերի նախարար Զարուհի Բաթոյանը «Ազատություն» ռադիոկայանի ֆեյսբուքյան ասուլիսի ընթացքում անդրադարձել է կենսաթոշակներին և ասել, որ նախարարությունը խնդիր ունի կենսաթոշակը փոխանցելու հետ կապված, եթե տվյալ քաղաքացին ՀՀ-ում չի գտնվում. «Շուտով կստորագրենք ԵԱՏՄ պայմանագիր, որի շրջանակներում կկարգավորվի կենսաթոշակների տրամադրման կարգը՝ ըստ իրավունքի սահմանման չափերի: Ցավով պիտի նշեմ, որ այսօր կենսաթոշակը տրամադրվում է որպես աջակցություն և կապ չունի աշխատավարձի հետ, որ մարդ նախկինում ստացել է»: Զարուհի Բաթոյանը նշեց, որ իր նախարար լինելու ժամանակ կարևոր է հաշմանդամություն ունեցող անձանց կարիքի գնահատման մոդելի ստեղծումը, որի համաձայն՝ հաշմանդամին ապահովվում են սոցիալական ներառմամբ: Մեկ այլ ձեռքբերում է երեխաների՝ մանկատուն մուտքը կանխարգելելը: Նախարարի խոսքով՝ պետք է ռեսուրսներ ուղղվեն ընտանիքներ, որոնք կկարողանան օգնել պահել երեխաներին: