Քրեական հեղինակություն Արտյոմ Կանևսկոյը սևազգեստ խմբերի մասին
Քրեական հեղինակություն Արտյոմ Կանեւսկոյ մականունով հայտնի Արտյոմ Հարությունովը այսօր դատարանում էր՝ ամբաստանյալի կարգավիճակով:
Կանեւսկոյը սույն թվականի հունվարի 11-ի երեկոյան «ասֆալտին փռելու» օպերացիայի շրջանակում բերման էր ենթարկվել ոստիկանության 6-րդ վարչություն. նրա մեքենայի զննությամբ հայտնաբերվել էր «Սայգա ՄԿ» տեսակի որսորդական հրացան:
Նիստի ավարտին Արտյոմ Կանեւսկոյը, պատասխանելով լրագրողների հարցերին, ասաց, որ իր մեքենայում հայտնաբերված զենքն իրեն չի պատկանում, ինքն ապօրինի զենք չունի: Հարցին՝ ձեր անձի դեմ ուղղված հատուկ վերաբերմունք տեսնո՞ւմ եք, Կանեւսկոյը կարճ պատասխանեց. «100 տոկոս»: Հայկական ժամանակի դիտարկմանը, որ հաճախ է հայտնվում ոստիկանների ուշադրության կենտրոնում, նա պատասխանեց, որ չգիտի՝ ինչու է այդպես:
ՀԺ-ն նշում է, որ Կանեւսկոյի անունը շոշափվում է մեկ այլ քրեական հեղինակություն Դոն Պիպո անունով հայտնի Արթուր Ասատրյանի սպանությունը պատվիրելու մեջ:
Լրատվականի հարցին՝ ճի՞շտ են այդ տեղեկությունները, Կանեւսկոյը ասաց. «Չկա տենց բան, անկապ բաներ են խոսում, հիմա, եթե տենց բաներ ասում են, ուրեմն ես դուրսը ի՞նչ գործ ունեմ»:
Ճշտող հարցին՝ Դոն Պիպոյի հետ ի՞նչ հարաբերությունների մեջ է գտնվում, Կանեւսկոյն ասաց, թե նրան չի էլ ճանաչում: «Ոնց որ առաջին անգամ եք չէ՞ ինձ տեսնում, մենք ո՞նց կարող ենք իրար հետ թշնամություն ունենանք, նույն բանն ա»: Նա նաեւ հաստատեց այն տեղեկությունը, որ այդ գործի շրջանակում հարցաքննվել է:
Հարցին, թե Հայաստանում ինչո՞վ է զբաղվում, Կանեւսկոյն ասաց, որ բարեգործական հիմնադրամ ունի:
Անդրադառնալով սեւազգեստ խմբերին՝ Կանեւսկոյն ասաց, թե հանդիպել է նրանց. «Սպեցը սեւ շորերով ման ա գալիս»,-ասաց նա՝ նկատի ունենալով ոստիկանության 6-րդ վարչության աշխատակիցներին:
