Այսօր կրակոցներ են հնչել Երևանում։ Ժամը 08։10-ի սահմաններում ոստիկանության Մալաթիայի բաժին ահազանգ է ստացվել, որ Հարավ-Արևմտյան թաղամասի Անդրանիկի 90 շենքի բակում կրակոցներ են հնչել և կա վիրավոր։ Ինչպես տեղեկացնում է shamshyan. com-ը, այս պահին քննիչները դեպքի վայրի զննություն են կատարում։ Իրավապահները նշված շենքի առաջին հարկում հայտնաբերել են հրազենից արձակված 2 գնդակ։ Պարզվել է նաև, որ դեպքի վայրից ոտքի մասում ստացած հրազենային վնասվածքով «Աստղիկ» բժշկական կենտրոն է տեղափոխվել նշված շենքի բնակիչ Ջոնի Սամսոնյանը։ Գ. Շամշյանի տեղեկություններով՝ վերջինն աշխատում է Պաշտպանության նախարարության զորամաերից մեկում որպես հրամանատար։ Հրազենային վնասվածք ստացած հրամանատարն ինքն է հենց վնասազերծել իր վրա կրակողին, ով տեղափոխվել է ոստիկանության Մալաթիայի բաժին։ Նախաքննության շահերից ելնելով՝ այս պահին կրակողի ինքնությունը չի հրապարակվում։