Խոշոր խարդախություններ՝ ՎՏԲ բանկի Սիսիանի մասնաճյուղում․ Բացահայտում

Ավրորա Մեդիայի աղբյուրները հայտնում են, որ մոտ մեկ շաբաթ առաջ "ՎՏԲ" բանկի Սյունիքի մարզի Սիսիան քաղաքի մասնաճյուղում աղմկահարույց բացահայտում է տեղի ունեցել։ Ինչպես մեզ հետ զրույցում հայտնել են տեղի աղբյուրները, բանկի մասնաճյուղի ոսկու գրավադրմամբ զբաղվող աշխատակիցը որդու հետ միասին խարդախությամբ միլիոնների հասնող վնաս է պատճառել բանկին և քաղաքացիներին։ Մասնավորապես, մեր աղբյուրը նշում է, որ քաղաքացիների գրավադրած ոսկեղենը կինը տրամադրել է որդուն, ով ոսկերիչ է, փոխարենը՝ քաղաքացիներին վերադարձրել փոփոխված, անորակ տարբերակը։ Խարդախությունը բացահայտվել է այն ժամանակ, երբ քաղաքացիներից ոմանք թերություններ են նկատել ոսկեղենի վրա։ Մի քաղաքացի հայտնել է, որ իրեն այլ վզնոց են տրամադրել, քանի որ այն ավելի կարճ է, իսկ մեկ այլ քաղաքացու մատանու ադամանդե քարերը փոխարինված են եղել ցերկոն քարերով։ Ավրորայի աղբյուրները հայտնել են, որ բանկի մասնաճյուղը ժամանակավորապես փակվել է, քանի որ այնտեղ աուդիտորական ստուգումներ են անցկացվել։ Ստուգումների արդյունքում բազմաթիվ խախտումներ և մեքենայությունների սխեմա է բացահայտվել։ Այժմ մասնաճյուղը բաց է։ Ավրորա Մեդիան կապ է հաստատել նաև ՎՏԲ բանկի հանրային կապերի աշխատակցի հետ։ Մանրամասների վերաբերյալ կհաղորդենք հաջորդիվ։