Գևորգ Կոստանյանն առաջիկայում կանդրադառնա Քոչարյանի գործին
Հարցաքննությունը ոչ թե անձով է պայմանավորված, այլ յուրաքանչյուր անձին հարցաքննելու անհրաժեշտությունը պետք է ծագի այդ պահին քննությամբ ձեռք բերված փաստական տվյալներից։ Այս մասին լրագրողների հետ զրույցում ասաց նախկին գլխավոր դատախազ Գեւորգ Կոստանյանը՝ պատասխանելով հարցին՝ հիմա՞ էլ է կարծում, որ ՀՀ երկրորդ նախագահ Ռոբերտ Քոչարյանին հարցաքննելու անհրաժեշտություն չկա։
«Ես քրեական գործի ընթացքին ծանոթ չեմ, բայց գաղափարն հետեւյալն է, որ եթե այդ պահին քրեական գործի նյութերը պարունակում են մեկ հիմք, հետո հաջորդ պահին քրեական գործերի ընթացքով առաջանում է այլ հիմք, կարող է հարցաքննության անհրաժեշտության առաջանալ կամ չառաջանալ»,–նշեց նա։
Նախկին դատախազը, սակայն, շեշտեց՝ եթե կան հիմքեր, պետք է հարցաքննել յուրաքանչյուրին, անկախ կարգավիճակից. «Հարցաքննությունը ոչ թե անձով է պայմանավորված, այլ յուրաքանչյուր անձին հարցաքննելու անհրաժեշտությունը պետք է ծագի այդ պահին քննությամբ ձեռք բերված փաստական տվյալներից։ Հարցաքննությունն ինքնանպատակ չէ, եթե կան հիմքեր, պետք է հարցաքննես ցանկացածին, անկախ կարգավիճակից»։
Հարցին՝ ինքը համաձա՞յն է այն պնդման հետ, որ նախագահը սահմանադրական կարգ չի տապալել, այլ կատարել է իր կարգավիճակից բխող գործողություններ, նա ասաց. «Ես առաջիկայում առիթը կստեղծեմ անդրադառնալու այդ թվում այդ գործին, այդ թվում անձեռնմխելիության սահմանադրական ինստիտուտի կիրառելիությանը տվյալ այլ դեպքերում»։
