Ղարաբաղի ամեն գյուղում, ամեն քաղաքում կծածանվի Ադրբեջանի դրոշը․ Մեհրիբան Ալիևա

Ադրբեջանի նախագահի տիկին, առաջին փոխնախագահ Մեհրիբան Ալիևան այցելել է երկրի զինված ուժերում ծառայության տարիներին հաշմանդամություն ստացած անձանց, գովել նրանց ու խոստացել, որ «Ղարաբաղը վերադարձնելու են» հենց այդպիսի մարդկանց շնորհիվ, ասել է թե՝ զինվորականների «շնորհիվ»։ «Այդպիսի եղբայրների հետ մենք անպայման կվերադարձնենք Ղարաբաղը։ Ղարաբաղի ամեն գյուղում, ամեն քաղաքում կծածանվի Ադրբեջանի դրոշը», – ասել է Մեհրիբան Ալիևան։ Հիշեցնենք, որ ՀՀ վարչապետի տիկին Աննա Հակոբյանն ԱՄՆ Կոնգրեսում կոչ էր արել Ադրբեջանի կանանց միանալ «Կանայք հանուն խաղաղության» նախաձեռնությանը: Հակոբյանն ասել է, որ «Կանայք հանուն խաղաղության» արշավի նպատակն է միավորել Լեռնային Ղարաբաղի հակամարտության բոլոր կողմերի կանանց, որպեսզի մերժեն պատերազմն ու միավորեն իրենց ջանքերը խնայելու մարդկային կյանքեր հակամարտության բոլորի կողմերի համար: Իսկ վերջնական նպատակն է ստեղծել կանանց համաշխարհային ցանց հանուն Լեռնային Ղարաբաղում, ինչպես նաև աշխարհի այլ թեժ կետերում խաղաղության հաստատման համար: