ՙԽնդիրը շուտով կլուծվի. ինքն այլևս այդ պաշտոնում չի լինի՚. Նազենի Ղարիբյան

ՙԵս աշխատանքից չեմ ազատել իրեն, իր պայմանագիրը վերջացել էր, ավարտվել էր, մենք ևս երեք ամսով նորոգել ենք, 3 ամիս հետո պայմանագրի ժամկետն ավարտվեց և ավտոմատ կերպով դադարեցվեց՚,- այս մասին ասել է մշակույթի նախարարի պարտականությունները կատարող Նազենի Ղարիբյանն՝ անդրադառնալով Վանաձորի Հովհաննես Աբելյանի Անվան Պետական Դրամատիկական թատրոնի տնօրենի՝ աշխատանքից ազատվելուն: Ինչ վերաբերում է այն հանգամանքին, որ արդեն հայտնի դեմքերը չեն ցանկանում Նազենի Ղարիբյանին այդ պաշտոնում տեսնել, ինչպե՞ս է նա պատկերացնում կոնֆլիկտի լուծումը. ՙՔանի դեռ ես համարում եմ, որ որևէ սխալ բան չեմ անում, ես կատարում եմ իմ աշխատանքը, և իրենց էլ հորդորում եմ կատարել իրենց աշխատանքը: Քանի դեռ իմ անմիջական ղեկավարն ինձ չի ասում՝ Դուք պետք է հեռանաք, ես կշարունակեմ մնալ իմ աշխատանքին՚,- ասել է Ղարիբյանը՝ հավելելով, որ այն կարծիքին է, որ խնդիրը շուտով կլուծվի՝ Մշակույթի նախարարությունը շուտով միանալու է ԿԳՆ-ին, ինքն այլևս այդ պաշտոնում չի լինի: ՙԷստեղ խնդիրը շատ հաստակ է՝ եթե մարդը չի կատարում տնօրենի պարտականությունները, ինչու պետք է մնա այդ պաշտոնին՚,- Նազենի Ղարիբյանն՝ անդրադարձել է Ալեքսանդր Սպենդիարյանի անվան օպերայի և բալետի ազգային ակադեմիական թատրոնի տնօրեն և գեղարվեստական ղեկավար Կոնստանտին Օրբելյանի աշխատանքից ազատելու հանգամանքին: Ոչ ոք չի վիճարկում, որ Օպերային թատրոնը վերջին 2 տարիների ընթացքում տեղաշարժեր ունի՝ համեմատած նախկին տարիների: Բայց խնդիրն այստեղ այլ է՝ եթե մեկը զբաղեցնում է տնօրենի, գեղարվեստական ղեկավարի և գլխավոր դիրիժորի պաշտոնները և մեծ մասամբ Հայաստանում չի, ստացվում է, որ տնօրենի պարտականությունները, այսինքն՝ ղեկավարի դերակատարությունը կատարում է փոխտնօրենը: Ըստ Նազենի Ղարիբյանի՝ 3 ղեկավար պաշտոն ունեցող մարդը, երբ տարվա 365 օրվանից 200 օրվա ընթացքում իր ղեկավարած հիմնարկում չէ, ապա հարց է առաջանում՝ ով է ղեկավարում այդ հիմնարկը: