Շիրակի, Կոտայքի մարզերում ընտրակաշա՞ռք է բաժանվում․կպարզի ոստիկանությունը

ՀՀ գլխավոր դատախազությունն արձագանքել է «Սասնա ծռեր»ի ընտրական ցուցակով պատգամավորի թեկնածու առաջադրված Ստեփան Գրիգորյանի թե Շիրակի և Կոտայքի մարզերում ընտրակաշառք է բաժանվում: «Այսօր մի շարք լրատվամիջոցներ տեղեկատվություն էին տարածել «Սասնա ծռեր» համահայկական կուսակցության համամասնական ցուցակով պատգամավորի թեկնածու առաջադրված Ստեփան Գրիգորյանի հայտարարության մասին: Ըստ մամուլի հրապարակումների, նա ասել է, որ իրենք տեղեկություններ ունեն Շիրակի և Կոտայքի մարզերում ընտրակաշառք բաժանելու գործընթաց սկսելու վերաբերյալ: ՀՀ գլխավոր դատախազությունից այս հրապարակումներն ուղարկվել են ՀՀ Ոստիկանապետին՝ Ոստիկանության կողմից դրանցում ներկայացված հանգամանքները ստուգելու և օպերատիվ հետախուզական աշխատանքներ իրականացնելու նպատակով»,- հայտնում են դատախազության հանրային կապերի բաժնից: Հիշեցնենք, որ Գրիգորյանը հայտարարել էր, թե վերջին շրջանում իրենք մտահոգիչ լուրեր են ստանում. քաղաքացիները տեղեկություններ են հաղորդել, որ ընտրակաշառքի բաժանման պրոցես է սկսվել: «Չեմ կարծում, որ դա մեծ ծավալի կլինի, դուք գիտեք, որ նաև Նիկոլ Փաշինյանը մտահոգություն հայտնեց մեկ դեպքի հետ կապված: Մենք ունեցել ենք էս ձևի ինֆորմացիա Գյումրիում և Կոտայքի մարզում: Ես կոչ եմ անում ոստիկանությանն ուշադիր հետևել այդ քաղաքական ուժերին»,- ասել էր նա։