Փարիզում ցույցերին են միացել շտապօգնության աշխատակիցները

Փարիզում շարունակվում են բողոքի ակցիաները։ Շտապօգնության առնվազն 100 աշխատակից փակել է Փարիզի կենտրոնական ճանապարհները: Շտապօգնության մեքենաները կայանել են Համաձայնության հրապարակում և մոտակա կամրջի վրա՝ Ազգային ժողովի շենքից ոչ հեռու: Բուժաշխատողները միացրել են մեքենաների ձայնային ազդանշանները և փակել են մուտքը դեպի Ռիվոլի փողոց: Բուժաշխատողները պահանջում են չեղարկել սոցիալական ապահովագրության և բժշկական նշանակության փոխադրումների ֆինանսավորման մասին նոր օրենքը: Ըստ ցուցարարների՝ նոր օրենքը նախապատվություն է տալիս փոխադրող խոշոր ընկերություններին, քանի որ ավելի փոքր ընկերությունները չեն կարողանա մրցակցել գնային քաղաքականությամբ: Հիշեցնենք, որ Ֆրանսիայում արդեն շուրջ 3 շաբաթ է՝ շարունակվում են բողոքի ակցիաները վառելիքի գների բարձրացման դեմ: Շաբաթ օրը տեղի ունեցած աննախադեպ անկարգություններից հետո Ֆրանսիայի նախագահ Էմանուել Մակրոնը կառավարությանը հանձնարարել է երկխոսություն սկսել ցուցարարների հետ: