Անօդաչուների զանգվածային հարձակումներ Ռուսաստանի շրջանների վրա․ կան վիրավորներ

Սեպտեմբերի 3-ի գիշերը Ռուսաստանի մի շարք շրջաններ ենթարկվել են անօդաչու թռչող սարքերի հարձակումների։

Ռոստովի մարզի նահանգապետ Յուրի Սլյուսարի հաղորդմամբ՝ գիշերվա ընթացքում ոչնչացվել է շուրջ 20 ԱԹՍ։ Դրանք խոցվել են Տագանրոգում և մարզի յոթ շրջաններում։ Շոլոխովսկի շրջանում ԱԹՍ-ի հարձակումից հետո անտառում հրդեհ է բռնկվել՝ ընդգրկելով շուրջ 0,2 հեկտար տարածք։ Տուժածներ չկան։

Միաժամանակ Մոսկվայի քաղաքապետ Սերգեյ Սոբյանինը հայտնել է, որ մայրաքաղաքի ուղղությամբ թռչող 27 անօդաչու է չեզոքացվել։ ԱԹՍ-ների բեկորների ընկնելու վայրերում աշխատում են արտակարգ ծառայությունները։

Անօդաչուների հարձակումներ են գրանցվել նաև Բելգորոդի մարզում։ Տեղական իշխանությունների տվյալներով՝ երեք խաղաղ բնակիչ վիրավորվել է։ Վնասվել են բնակելի տուն, ավտոմեքենաներ, էլեկտրահաղորդման գիծ, ձեռնարկություններ և ենթակառուցվածքային օբյեկտներ։ Շեբեկինոյում հարվածներից հետո վնասվել են նաև ավտոբուս և բեռնատարներ, որոշ հատվածներում հրդեհ է բռնկվել։

Ռուսական կողմը հարձակումների համար մեղադրում է Ուկրաինային։