«Նուբարաշեն» ՔԿՀ-ում դատապարտյալների ծեծի մասին լուրեր էին տարածվել․ ՔԿԾ-ն պարզաբանում է

Լրատվամիջոցներում տեղեկություններ էին տարածվել «Նուբարաշեն» քրեակատարողական հիմնարկում տեղի ունեցած միջադեպի մասին։ Քրեակատարողական ծառայությունը պարզաբանում է ներկայացրել՝ հայտնելով, որ որևէ դատապարտյալ ծեծի չի ենթարկվել։

ՔԿԾ-ի հաղորդմամբ՝ օգոստոսի 25-ին «Նուբարաշեն» ՔԿՀ-ի ծառայողները խցերից մեկում խուզարկություն իրականացնելիս դատապարտյալներից մեկի մոտ կասկածելի փաթեթ են նկատել։

Խուզարկությունը խոչընդոտելու նպատակով խցում պահվող դատապարտյալները ֆիզիկական դիմադրություն են ցուցաբերել։ Նրանցից մեկը հարվածել է ծառայողի դեմքին և կասկածելի փաթեթը նետել սանհանգույցի կոյուղատարի մեջ։

ՔԿԾ-ից նշում են, որ անհնազանդության և ծառայողի նկատմամբ բռնության պայմաններում դատապարտյալների նկատմամբ օրենքով սահմանված կարգով ֆիզիկական ուժ է կիրառվել։ Միաժամանակ ծառայությունից հերքում են դատապարտյալներին ծեծի ենթարկելու մասին տեղեկությունները։

Դատապարտյալներից մեկը ոտքի շրջանում ցավերի պատճառով տեղափոխվել է հիվանդանոց, որտեղ նրա մոտ սալջարդ է արձանագրվել։ Նույն օրը նա վերադարձվել է ՔԿՀ։ Մյուս ազատազրկվածների մոտ մարմնական վնասվածքներ չեն արձանագրվել։

Խուզարկության ընթացքում խցի թաքստոցներից հայտնաբերվել են թմրամիջոցի նմանվող հեղուկ զանգվածով սրվակներ, 5 բջջային հեռախոս, 9 բաժանորդային քարտ, լիցքավորման 3 սարք և դեղահաբեր, այդ թվում՝ անհայտ ծագման։

Դեպքի և քրեակատարողական ծառայողի նկատմամբ բռնության վերաբերյալ հաղորդում է ներկայացվել Քննչական կոմիտեի Էրեբունի և Նուբարաշեն վարչական շրջանների քննչական բաժին։