Ազատություն քաղբանտարկյալներին. Երևանում բողոքի ակցիա է ընթանում ԵՄ գրասենյակի մոտ

մի խումբ քաղաքացիներ բողոքի ակցիա են անում Երևանում ԵՄ գրասենյակի դիմաց. նրանք «Արդարադատությունը չպետք է լինի քաղաքական հաշվեհարդար», «Ո՛չ բռնապետությանը», «Ազատություն քաղբանտարկյալներին» պաստառներով ու կալանավորվածների նկարներով պահանջում են աջակցել Հայաստանում քաղբանտարկյալների ազատ արձակմանը։

«Այստեղ մենք հավաքվել ենք` մեր բողոքի ձայնը բարձրացնելու ՀՀ–ում գոյություն ունեցող ահռելի թվով քաղաքական բանտարկյալների խնդրի շուրջ։ Կալանքը որպես խափանման միջոց ընտրելու այս արատավոր պրակտիկան ազատազրկել է շատերին։ Այսօր ազատազրկված են Արեգնազ Մանուկյանը, Անդրանիկ Թևանյանը, Արմեն Աշոտյանը, Գագիկ Ծառուկյանը, Ավետիք Չալաբյանը, Արթուր Սարգսյանը և ՀՀ շատ այլ քաղաքացիներ»,– դիմելով ԵՄ–ին՝ ասաց «Մայր Հայաստան» շարժման անդամ Մանուկ Սուքիասյանը։

Հավաքվածները նշեցին, որ ԵՄ գրասենյակի դիմաց են, քանի որ Հայաստանում խախտվում են մարդու հիմնարար իրավունքները, ինչին պետք է արձագանքեն միջազգային և իրավապաշտպան կազմակերպությունները։

«Համահայկական ճակատ» շարժման անդամ Ռուզաննա Ստեփանյանն էլ նշեց, որ «Մայր Հայաստան» կուսակցության վարչության անդամ Արեգնազ Մանուկյանին միայն այսօր՝ դստեր ծննդյան օրն են թույլ տվել հանդիպել երեխային։

«ԵՄ–ն շատ լավ գիտի, որ Հայաստանը կալանքների առումով ռեկորդակիր է, մենք այսօր ունենք հարյուրավոր կալանավորվածներ։ Երբ Նիկոլ Փաշինյանն էր դատապարտված, այդ ժամանակ Արեգնազ Մանուկյանն անձամբ էր նախաձեռնում գնալ ու լուսաբանել Փաշինյանի կնոջ ասուլիսները, քանի որ ասում էր՝ Փաշինյանն անչափահաս երեխաների հայր է»,– լրագրողների հետ զրույցում ասաց Ստեփանյանը։

Ակցիայի մասնակիցներն իրենց հետ նաև տորթ էին բերել՝ Արեգնազ Մանուկյանի դստեր ծննդյան օրը շնորհավորելու համար։