ԱԺ-ում սեղաններին հարվածելու հերթը ՔՊ-ինն էր․ «Կաթողիկոս» բառից հետո

ԱԺ-ում հերթական լարված ու աղմկոտ իրավիճակը ստեղծվեց «Կաթողիկոս» և «Կտրիճ Ներսիսյան» ձևակերպումների շուրջ։

«Հայաստան» խմբակցության պատգամավոր Քրիստինե Վարդանյանի ելույթի ժամանակ, երբ նա արտաբերեց «Կաթողիկոս» բառը, ՔՊ-ական պատգամավորները սկսեցին հարվածել սեղաններին՝ փաստացի կրկնելով ընդդիմադիրների նախորդ օրվա վարքագիծը։ 

Վարդանյանը, նկատելով արձագանքը, շարունակեց նույն ձևակերպումը՝ կրկնելով, որ քննարկվում էր «Կաթողիկոսի հետ կապված հարցը»։ Դրան զուգահեռ ՔՊ-ականները շարունակում էին հարվածել սեղաններին, իսկ ընդդիմադիր պատգամավորները սկսեցին ծափահարել։

Այս իրավիճակը հաջորդեց նախորդ օրվա ԱԺ նիստում տեղի ունեցածին, երբ ՔՊ-ական պատգամավորների ելույթներում Ամենայն Հայոց Կաթողիկոս Գարեգին Բ-ին անվանում էին «Կտրիճ Ներսիսյան», ինչին ընդդիմադիրները արձագանքում էին սեղաններին հարվածելով։

Այդ ժամանակ ԱԺ նախագահ Ռուբեն Ռուբինյանը զգուշացրել էր, որ նման պահվածքը կրկնվելու դեպքում ՔՊ-ն նույն կերպ կարձագանքի։

 

Այսօր, փաստացի, այդ հայտարարությունն իրագործվեց․ ընդդիմադիր պատգամավորի կողմից «Կաթողիկոս» ձևակերպումը հնչեցնելուց հետո ՔՊ-ականները սկսեցին հարվածել սեղաններին, իսկ ընդդիմադիրները՝ ծափահարել։

Ռուբինյանն արձագանքեց. «Էդպես եք ուզում՝ կլինի էդպես»:

Ռուբինյանը ստիպված էր միջամտել և կոչ անել պատգամավորներին դադարեցնել իրավիճակը՝ նշելով, որ պետք է մնալ կոռեկտության սահմաններում։

 

Հատկանշական է, որ քննարկվող հարցն իրականում Արուսյակ Ջուլհակյանի՝ մշտական հանձնաժողովի նախագահի պաշտոնում առաջադրման/ընտրության հարցն էր, սակայն քննարկումն աստիճանաբար տեղափոխվեց այլ հարթություն․ ելույթների կենտրոնում հայտնվեցին ոչ թե հանձնաժողովի աշխատանքը կամ թեկնածությունը, այլ «Կաթողիկոս» և «Կտրիճ Ներսիսյան» ձևակերպումները։

ԱԺ-ում երկու կողմերի միջև ձևավորվել է յուրօրինակ «փոխադարձ բոյկոտի» մեխանիզմ․ «Կտրիճ Ներսիսյան»՝ ընդդիմության սեղաններին հարվածներ, «Կաթողիկոս»՝ ՔՊ-ի սեղաններին հարվածներ։