Արթուր Սարգսյանը քաղաքական պատանդ է, նրա նկատմամբ հետապնդումը պետք է դադարեցվի. «Հայաստան» դաշինք

«Հայաստան» դաշինքը հայտարարություն է տարածել ԱԺ պատգամավոր Արթուր Սարգսյանի խափանման միջոցը տնային կալանք թողնելու վերաբերյալ։

Դաշինքի փոխանցմամբ՝ հուլիսի 30-ին դատարանը մերժել է Արթուր Սարգսյանի պաշտպանների միջնորդությունը՝ վերացնելու պատգամավորի նկատմամբ կիրառվող տնային կալանքը և այն երկարաձգել է ևս մեկ ամսով։

«Հայաստան» դաշինքը պնդում է, որ դատարանի որոշումը չունի բավարար իրավական հիմնավորում և հակասում է Սահմանադրական դատարանի 2021 թվականի դեկտեմբերի 7-ի որոշմանը։

Ըստ հայտարարության՝ Արթուր Սարգսյանը, լինելով ժողովրդի կողմից ընտրված պատգամավոր, զրկված է իր լիազորություններն ազատ իրականացնելու հնարավորությունից, ինչը դաշինքը գնահատում է ոչ միայն պատգամավորի իրավունքների, այլև Ազգային ժողովի գործունեության և քաղաքացիների ընտրական իրավունքի խախտում։

«Հայաստան» դաշինքը հայտարարել է, որ Արթուր Սարգսյանին համարում է «քաղաքական պատանդ» և պնդում է, որ նրա նկատմամբ իրականացվող գործընթացի նպատակը պատգամավորական գործունեությունը սահմանափակելն ու ընդդիմադիր ձայնը լռեցնելն է։

Դաշինքը նաև պահանջել է անհապաղ ազատ արձակել Արթուր Սարգսյանին, «18 Արդարների գործով» անցնող բոլոր մեղադրյալներին և, ինչպես նշվում է հայտարարությունում, բոլոր քաղաքական բանտարկյալներին։

Հայտարարության համաձայն՝ դաշինքը դատարանի որոշման վերաբերյալ իր բողոքն ու ահազանգը փոխանցելու է միջազգային գործընկերներին։