ԱԺ պատգամավոր Արթուր Սարգսյանը կմնա տնային կալանքում․ դատարանը երկարաձգեց ժամկետը

ՀՀ 9-րդ գումարման Ազգային ժողովի պատգամավոր Արթուր Սարգսյանի նկատմամբ կիրառված տնային կալանքի ժամկետը երկարաձգվել է ևս մեկ ամսով։

Հիշեցնենք՝ Բագրատ սրբազանի և մյուսների գործով դատական նիստում այսօր երկար քննարկվել էր ԱԺ «Հայաստան» խմբակցության պատգամավոր Արթուր Սարգսյանի խափանման միջոցը փոխելու հարցը։

Սարգսյանի պաշտպան Արամ Վարդևանյանը միջնորդել էր անհապաղ վերացնել տնային կալանքը՝ վկայակոչելով Սահմանադրական դատարանի ՍԴՈ-1619 որոշումը։ Փաստաբանի խոսքով՝ պատգամավորի կարգավիճակ ձեռք բերելու պահից անձը, բացառությամբ Սահմանադրության 96-րդ հոդվածի 2-րդ մասով նախատեսված դեպքերի, չի կարող ազատությունից զրկվել առանց Ազգային ժողովի համաձայնության։

Վարդևանյանը նաև նշել էր, որ ՍԴ որոշմամբ արձանագրված է՝ պատգամավորի կարգավիճակ ձեռք բերելու պահից անձը չի կարող շարունակել պահվել ազատությունից զրկված վիճակում։ Նրա պնդմամբ՝ Սարգսյանը պատգամավորի կարգավիճակ է ստացել հուլիսի 21-ին՝ Կենտրոնական ընտրական հանձնաժողովի արձանագրության հրապարակման պահից, ուստի տնային կալանքը պետք է անհապաղ վերացվեր։

Դատարանը, սակայն, չի բավարարել պաշտպանական կողմի միջնորդությունը և Արթուր Սարգսյանի տնային կալանքը երկարաձգել է ևս մեկ ամսով։