Պելեի՝ ԱԱ-1958-ի եզրափակչի մարզաշապիկը վաճառվել է գրեթե 5 մլն դոլարով

Բրազիլացի լեգենդար ֆուտբոլիստ Պելեի՝ 1958 թվականի աշխարհի առաջնության եզրափակչում կրած խաղային մարզաշապիկը Sotheby's աճուրդում վաճառվել է 4,88 միլիոն դոլարով։

Հենց այդ մարզաշապիկով Պելեն մասնակցել էր իր առաջին աշխարհի առաջնության եզրափակչին, որտեղ Բրազիլիայի հավաքականը 5:2 հաշվով հաղթել էր մրցաշարի տանտեր Շվեդիային։ Այն ժամանակ ընդամենը 17 տարեկան և 249 օրական Պելեն դարձել էր դուբլի հեղինակ և մինչ օրս մնում է աշխարհի առաջնության եզրափակչում գոլ խփած ամենաերիտասարդ ֆուտբոլիստը։

Պելեն ֆուտբոլի պատմության միակ խաղացողն է, որը երեք անգամ դարձել է աշխարհի չեմպիոն՝ 1958, 1962 և 1970 թվականներին։

Չնայած այս վաճառքը դարձել է պատմության ամենաթանկ մարզաշապիկներից մեկը, ռեկորդը շարունակում է պատկանել Դիեգո Մարադոնայի մարզաշապիկին, որը 2022 թվականին վաճառվել էր 9,3 միլիոն դոլարով։ Այդ մարզաշապիկով Մարադոնան 1986 թվականի աշխարհի առաջնության քառորդ եզրափակչում Անգլիայի դեմ հեղինակել էր հայտնի «Աստծո ձեռքը» գոլը և ևս մեկ հիշարժան անհատական գոլ։