Հրդեհավտանգ իրավիճակ և քամու ուժգնացում․ եղանակի նոր կանխատեսումը

Հուլիսի 28-31-ը և օգոստոսի 1-2-ը Արարատյան դաշտում, Երևան քաղաքում, Արագածոտնի, Կոտայքի ու Վայոց ձորի նախալեռնային գոտիներում, ինչպես նաև Սյունիքի հովտային հատվածներում սպասվում է բարձր կարգի հրդեհավտանգ իրավիճակ։ Երևանում հուլիսի 28-ի ցերեկային ժամերին, 30-31-ին և օգոստոսի 1-ին տեղումներ չեն կանխատեսվում։ 

Մայրաքաղաքի առանձին հատվածներում հուլիսի 29-ի և օգոստոսի 2-ի երեկոյան հնարավոր են կարճատև անձրևներ ու ամպրոպ։ Հուլիսի 28-31-ը և օգոստոսի 1-2-ը երեկոյան ժամերին Երևանում սպասվում է քամու ուժգնացում՝ 14-17 մ/վ արագությամբ։ Հանրապետության տարածքում հուլիսի 28-ի ցերեկը, 30-ի ցերեկը և 31-ին գրանցվելու է առանց տեղումների եղանակ։ Որոշ շրջաններում հուլիսի 29-ի երեկոյան, 30-ի գիշերը, օգոստոսի 1-ի երեկոյան, ինչպես նաև 2-ի գիշերային ու կեսօրից հետո ընկած հատվածում սպասվում են կարճատև անձրևներ և ամպրոպ։ 

Քամին կլինի հարավարևմտյան՝ 2-5 մ/վ արագությամբ։ Հուլիսի 28-31-ը և օգոստոսի 1-2-ը երեկոյան ժամերին Արմավիրում, Արագածոտնի ու Կոտայքի նախալեռներում, ինչպես նաև Շիրակի առանձին հատվածներում քամին կուժգնանա՝ հասնելով 15-18 մ/վ-ի։ Օդի ջերմաստիճանի էական փոփոխություններ չեն սպասվում։