ՖԻՖԱ-ի նախագահ Ինֆանտինոյից պահանջում են բացահայտել Թրամփի հետ շփումների մանրամասները

ԱՄՆ Կոնգրեսի Ներկայացուցիչների պալատի դեմոկրատ անդամ Ջեյմի Ռասկինը ՖԻՖԱ-ից և կազմակերպության նախագահ Ջանի Ինֆանտինոյից պահանջել է մինչև օգոստոսի 9-ը տեղեկություններ ներկայացնել ԱՄՆ կառավարության, մասնավորապես` նախագահ Դոնալդ Թրամփի հետ ունեցած շփումների վերաբերյալ։ Այս մասին հայտնում է Deutsche Welle-ն։

Ռասկինը նաև պահանջել է, որ Ինֆանտինոն, եթե գտնվի ԱՄՆ-ում, ներկայանա Ներկայացուցիչների պալատի դատական հանձնաժողով և ցուցմունք տա։

Կոնգրեսականը նշել է, որ ՖԻՖԱ-ն գրասենյակ է վարձակալել Նյու Յորքի «Trump Tower»-ում, ինչը հարցեր է առաջացրել կազմակերպության և Սպիտակ տան հարաբերությունների վերաբերյալ։

Նա պահանջել է ներկայացնել նաև Թրամփին, նրա վարչակազմին կամ ընտանիքի անդամներին փոխանցած նվերների և այլ փոխանցումների վերաբերյալ տեղեկությունները։

Բացի այդ, Ռասկինը ցանկանում է ստանալ ՖԻՖԱ-ի և ԱՄՆ կառավարության միջև նամակագրությունը 2026 թվականի ֆուտբոլի աշխարհի առաջնության տոմսերի գների շուրջ, ինչպես նաև Մայամիի և Նյու Յորքի ՖԻՖԱ-ի գրասենյակներ այցելած անձանց ցուցակները։