Ավելի քան 170 հազար մարդ՝ հրդեհների հետևանքով տարհանված կամ մեկուսացած Իսպանիայում

Իսպանիայում վերջին օրերին բռնկված անտառային հրդեհների պատճառով ավելի քան 170 հազար բնակիչ ստիպված է եղել լքել իրենց բնակավայրերը կամ սահմանափակել տեղաշարժը: Այս մասին տեղեկացնում է ABC թերթը՝ վկայակոչելով իշխանությունների տրամադրած տվյալները: Մասնավորապես, Ավիլայի և Տոլեդոյի նահանգներից, ինչպես նաև Մադրիդի շրջանից տարհանվել է ավելի քան 63 հազար մարդ, իսկ շուրջ 28 հազարին անվտանգության ապահովման նպատակով հրահանգվել է չլքել տները: 

Բացի այդ, Կաստելիոնի նահանգում տարհանվել է մոտ 16 հազար բնակիչ, իսկ ևս 65 հազարին խնդրել են մնալ տներում: Իսպանացի հրշեջները, համագործակցելով այլ երկրների իրենց գործընկերների հետ, շարունակում են կրակի օջախների մարման աշխատանքները, սակայն իրադրությունը դեռևս պահպանվում է լարված: