Երևանում դասերը կսկսվեն 08:15-ի՞ն, թե՞ 08։30-ին. MediaHub

Նախորդ տարվա սեպտեմբերի 1-ից մայրաքաղաքի բոլոր հանրակրթական դպրոցներում ուսումնական գործընթացը մեկնարկում էր ժամը 08:15-ին, մինչդեռ նախկինում դասասկիզբը 08:30-ին էր: 

Փոփոխության նպատակը աշակերտների՝ խցանումների հետևանքով ուշացումները կանխելն ու առավոտյան երթևեկությունը որոշակիորեն թեթևացնելն էր: Հանրության մի մասը պնդում էր, թե էական տեղաշարժ չի եղել, իսկ մյուս մասը նշում էր, որ քաղաքի հիմնական ճանապարհային զարկերակները առավոտյան բեռնաթափվել են: 

MediaHub-ը Երևանի քաղաքապետարանից փորձել է պարզել, թե արդյոք այս տարի ևս դպրոցներում դասերը կսկսվեն 08:15-ին: Քաղաքապետարանից MediaHub-ի հարցմանն ի պատասխան հայտնել են, որ այս պահին որևէ փոփոխություն նախատեսված չէ, իսկ լինելու դեպքում լրացուցիչ կտեղեկացնեն: Այսպիսով, այս տարի նույնպես սեպտեմբերի 1-ից Երևանի հանրակրթական բոլոր դպրոցներում դասապրոցեսը կմեկնարկի ժամը 08:15-ին։